為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 10 月 01 日

迴旋木馬的終端 孫耀威

對孫耀威(Eric)最深刻的印象,都是來自他初出道之時:〈愛的故事(上、下集)〉、高材生(會考5A1C,中大電腦科學及工程系二級榮譽畢業)、基督徒,橫睇掂睇都是乖乖仔一名,實情他的思想談吐,跟他的斯文外表反差很大,感覺很惹笑。

「大家硬係覺得:成績好,等於乖寶寶。我嘅成績係唔錯,但我由小學到大學都好曳:會打交、會駁老師嘴,係異類。我大學揀讀電腦,純粹係我鍾意打機,唔鍾意揸筆、唔鍾意對住本書,呢頭寫完個program,就可以撳個掣打陣機,好方便!」

時光荏苒,今天年屆四十四歲的他,已是人夫了,七月廿九日跟拍拖八年的陳美詩(Macy)在教堂交換了婚戒,共諧連理。「由交換嗰刻到o依家都冇除過,希望可以就咁戴足一世啦!」他摸着無名指上的婚戒說。

入行後廿多年來,Eric猶如坐上了迴旋木馬,到過台灣、日本、韓國和內地發展,在全世界走了個圈,看過了各種風景。去年,他終於返回這個出生成長的地方,開了工作室,又開西裝店,視作基地。

「香港始終係我覺得最舒服嘅地方。呢幾年我突然覺得,我呢隻雀仔,幾冇腳都好,喺出面覓食完,點都需要一個巢。」

為Eric利申:以上這句話,只係講緊搵食,絕對同婚姻無關。

 

 

跟拍拖八年的Macy正式成為夫妻,只尚欠擺酒。「我哋唔想咁多規範,所以可能最後只係搞個party,唔係坐喺度食鮑魚乜乜乜咁老正。」

 

結咗婚

孫耀威的婚戒,是戴在右手的。「純粹係戴左手有少少鬆,戴右手好似舒服啲。」說時,他本能地不停轉動着戒指。「其實我自己本身都幾鍾意戴首飾襯衫,但係呢隻戒指呢?我已經覺得唔係裝飾咁簡單,佢係有個好緊要嘅meaning,提醒住我:我已經結咗婚!所以,我由(行教堂)交換(戒指)嗰刻,到o依家都未除過!沖涼、大、小便,甚至游水、落海,我都一直戴住佢,我唔希望佢甩,亦都希望可以戴一世!」

一雙婚戒品牌為Darry Ring,他這隻刻有老婆陳美詩「Macy」的名字;老婆那隻,則刻着「Eric」。「隻戒指唔係特別貴,都係睇吓粒石幾大啫,哈哈!不過呢個牌子嘅概念幾搞嘢,男人買訂婚戒指嗰陣,已經要用身份證核對,一個男人一世人只可以買一次,即係話,你買咗一次之後,唔好諗離婚,然後再婚;亦都唔好諗買多隻畀小三,冇o架啦——我覺得呢樣嘢幾啱我,因為我覺得做人乜都可以失敗,但係感情、婚姻呢樣嘢係唔可以失敗!」

說罷,他沉思了一會道:「我睇婚姻呢樣嘢好重!所以,點解我求完婚咁耐,先結婚呢?因為我要儲夠勇氣,先可以做呢件事!」 

 

 

Eric跟Macy選擇了Darry Ring作婚戒。「由買訂婚戒指嗰刻開始,個男人一定要用身份證記錄,一世人只可以買一次,呢個概念好啱我!」