唔一定係荷李活，只要製作電影，已經係夢工場。有王晶嘅號召力，連兩大巨星劉德華同甄子丹，都首次喺電影《追龍》中攜手合作！電影改編自真人真事，由華仔重演其經典角色五億探長雷洛；丹爺則扮演大毒梟跛豪，一睇陣容、內容就知冇得輸！

今次「Paco巨星飯堂」，我就邀得丹爺同晶哥，去到位於九龍灣嘅「皇御園」，讓兩位貴賓品嘗特色嘅高質中菜，細說佢哋精心打造嘅高質電影。

晶哥同丹爺喺電影《追龍》中，一導一演，仲聯同劉德華，三人齊任電影嘅監製，拍出探長雷洛同跛豪嘅故事。

經典翻外

晶哥喺九一年曾監製電影《五億探長雷洛傳》及《五億探長雷洛傳II之父子情仇》，當年傳記式電影盛行，兩片累計大收5,300萬票房，華仔飾演嘅雷洛霸氣十足，成為經典角色。對《雷洛傳》深存情意結嘅晶哥，喺兩、三年前已經着手籌拍《追龍》，仲大膽搵嚟好友華仔，夥拍「宇宙最強」丹爺，組成金鑽級陣容。

今次兼任導演嘅晶哥說：「當年《雷洛傳》都冇乜着墨講跛豪，我覺得兩個梟雄人物，身處喺同一時空，冇可能冇精采嘅交集，所以我一直都想拍佢哋嘅故事。但係如果要拍，就一定要搵兩個超級巨星擺埋一齊，觀眾先會有入場嘅意欲。

「我先搵子丹，叫佢答yes or no，一等就幾個月。戲中另一個強對手，華仔係不二之選，當年佢得三十歲，都成功演到五十歲，演埋郭富城老竇啦！今次我搵佢（華仔）嗰時，初時佢有少少卻步，但華仔對雷洛一角都有情意結，所以後來都肯演。甄生配華仔，好有新鮮感！事實上今次華仔演出，對佢嚟講舉重若輕，唔使chok都覺得佢靚仔。」

丹爺近年憑《葉問》系列奠定正派形象，所以接拍《追龍》時，曾糾結咗幾個月先答應演出。「我同晶哥識咗好多年，今次都係首次演佢執導嘅戲。年幾前，晶哥畀咗兩份劇本我揀，其中一個要我演跛豪，我個心即時離一離。我拍戲有自己嘅原則同理念，但唔係話抗拒演反派。

「因為呢部戲係改編真人真事，又係反面教材人物，對動作演員嚟講，係好大挑戰，亦有機會跳出（葉問）框框，我覺得有使命感去做。」

我帶兩位貴賓去到位於九龍灣嘅「皇御園」，以特色嘅高質中菜，配合佢哋精心打造嘅高質電影。

丹爺同影帝華仔首次合作，喺電影中分飾黑白兩道嘅大人物，預計必定擦出火花。

錦繡玉鴛鴦（每位 $68），以醬油雞絲、火鴨絲、五柳菜及蟲草花一層層鋪叠，淋上以麻醬、浙醋、紹酒特別調製嘅醬汁，即成一道開胃惹味嘅頭盤。

家常肉碎焗釀豆腐（每位$48），豆腐釀入豬肉及冬菇後炸熟，淋上以鹹蛋黃、肉鬆及上湯而製成嘅湯汁，最後放入焗爐，令香氣昇華。

龍蝦汁大花蝦球（每位$298），採用優質越南「四頭」大花蝦，將其起肉並除去蝦皮，再醃製兩至三小時，令肉質爽滑彈牙，淋上以龍蝦頭及龍蝦殼熬製而成嘅鮮湯汁，鮮上加鮮。

巨星匯聚

最終丹爺落實演跛豪，其實同晶哥嘅誠意大有關係。「晶哥好有誠意，兩年前我喺多倫多拍緊《3X反恐暴族：重火力回歸》嘅時候，佢專登飛過嚟搵我傾。我覺得作為演員，可以豁出去，但係啲咁激嘅角色，我只係會演一次。」

為保證電影係高質素，丹爺與華仔仲齊齊兼任監製一職，前者興奮表示：「我好期待同華仔合作，加上呢種片種同角色，晶哥加華仔二人駕輕就熟，有太多經驗同心得。我要拍就梗係同佢哋兩個合作啦！而喺圈中，我同華仔出名係認真、執着同要求高，兩個人合作，會有新鮮感。

「我應承拍之後，就想塑造一個全新嘅跛豪出嚟，撇開九一年，由麥當雄編劇兼任出品人嘅版本。當年我老死呂良偉增肥演出咁經典，我覺得我要諗一個唔同角度去演，於是就做好多research，其實真人（跛豪）係瘦o架，又冇乜頭髮。所以新片嘅橋段、包裝，完全同舊版係兩回事。」

為咗更神似地演繹跛豪呢位潮州硬漢，丹爺特別跟潮州話教授學潮語，喺飯敍時佢仲即席示範同解說。

丹爺同呂良偉﹙右圖﹚私交甚篤，前者表示要演繹唔使增肥嘅跛豪，更唔會諗住同好友比較。

 

丹爺（左二）同晶哥（中），與戲中嘅潮州兄弟幫亢喻（左一）、師兄（右二）及姜皓文（右一），於泰國拍攝外景時，喺戲外都緊密交流。

金腿官燕釀竹笙（每位$228），選用上等印尼官燕釀入「一級竹笙」中，蒸熟後淋上湯芡，撒上金華火腿絲，清鮮養顏。

三蔥生爆海中蝦 （例$288），以青蔥、洋蔥、乾蔥，滾油下鑊香爆新鮮游水海中蝦。火候恰到好處，蔥香蔓延，海蝦鮮甜回甘，肉質緊致彈牙。

全面潮化

為演活潮州硬漢跛豪，丹爺除咗做足功課，仲研究埋潮州人嘅容貌，佢發覺潮州人大多係嘴厚鼻大，所以喺拍攝時，佢每日花三小時，以特技化妝「變臉」，事前又聘請教授貼身學潮州話，對演出一絲不苟。

「潮州話好難學！當我喺外地補緊《星戰》啲戲嗰陣，就特登喺香港請個潮州話教授飛去倫敦，廿四小時keep住喺我耳邊用潮州話轟炸。到拍攝時，我又請埋個教授喺現場執我嘅咬字同發音，仲迫埋劉浩龍同黑仔（姜皓文）學，亢喻就唔使啦，佢嘅角色係啞嘅！咁先可以入型入格做潮州幫嘛！」

當年嘅兩集《雷洛傳》，係由晶哥監製同拍板分拆兩集，今次佢續任監製，又兼任導演，吸引兩大傳奇演員，演繹兩位傳奇人物。

為咗變身跛豪，丹爺以特技化妝變臉，務求形神俱似。

1991年

事隔廿六年，劉德華再飾演雷洛一角，晶哥話佢覺得華仔

香燒琵琶乳鴿（每隻$88），嚴選淨重十二兩一隻嘅乳鴿王，以南乳及乳豬醬等調味醃製兩小時。原隻香燒烤熟後，再下油鍋炸香外皮，外皮酥脆，鴿肉嫩滑，肉味香濃。

沙律燒焗海鱸魚（例$268），選用智利海鱸魚，將其以西式食材西芹、洋蔥、紅蘿蔔等，加上中式的辣椒及腐乳醃製一晚，再放入焗爐烤熟，魚肉甜美軟滑，中西合璧。

砂窩鮮蟹肉桂花炒瑤柱（例$268），生拆原隻紅蟹肉，並加入雞蛋及瑤柱炒至乾身無油。，蛋絲嫩滑，蟹肉瑤柱共冶一爐，鮮上加鮮。

皇御園
地址：九龍灣啟祥道17號高銀金融國際中心1樓
電話：31882153