為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 09 月 17 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

歡樂同盟

話就話「人生如戲」,當劇集《同盟》嘅劇情進入白熱化階段,收視成績高達29點,戲內嘅主角們打到火花四濺,戲外嘅胡定欣、姚子羚(Elaine)同陳山聰,感情仍然深厚,為今次嘅「Paco巨星飯堂」,帶嚟不絕嘅笑聲,絕無劇中嘅火藥味。

我帶三位嘉賓去到位於灣仔嘅「Avanti Pizzeria」,品嘗特色意大利料理,講劇情講人情,笑位啱晒Channel。

《同盟》劇情進入白熱化階段,私交甚篤嘅Elaine、山聰同定欣,有默契地選擇性爆料,講結局劇情外,亦公開拍攝時趣事。

 

我帶三位紅人去到位於灣仔嘅「Avanti Pizzeria」,品嘗特色意大利料理,率先爆劇集結局篇劇情,仲有佢哋嘅新搞作。

 

定欣啱啱喺上周六(9日)度過三十六歲生日,自稱單身嘅佢話,正日同「胡說八道會」嘅好姊妹慶祝,唔需要咩特別禮物,只要所有親友身體健康,佢就滿足嘞!

 

自爆Big Boss

既然劇情步入高潮,當中嘅Big Boss「Rainman」,自然成為城中熱話,除咗已曝光嘅江美儀,仲有另一位Big Boss。曾經執導電影版《使徒行者》嘅監製文偉鴻,就話最後Big Boss要到大結局先會揭盅,定欣就表示:「我真係唔記得呢個Big Boss幾時現身,不過山聰一定有貼士俾觀眾!」

首次喺劇集飾演暖男嘅山聰,就話自己嘅角色冇「轉折位」。「好多觀眾覺得,我做得嘅角色,到最尾會有啲變化,但係我可以即刻爆,今次Kent(其劇中角色)係絕對冇呢種變化!Big Boss唔係我囉!」

劇中Kent嘅另一半,由Elaine飾演嘅Kate,喺結局篇都有一定嘅發揮。「Kate同Kent嘅愛情線已經有啲《羅密歐與茱麗葉》feel,結局篇就到我同飾演爹哋嘅郭峰,有生離死別位,都係幾感人嘅劇情嚟嘅。」

今次喺劇中個個都要應付動作場面,定欣就話:「我諗監製係睇中我有啲舞蹈底,我以前跳開中國舞,要打起上嚟,啲動作都可以handle到。不過我哋喺開工之前,都要去學MMA同巴西柔術,打嘅時候像真度會更加高。」

台扮夫婦

講到動作場面,上周Elaine喺車廂力敵四名大漢,之後就有網友二次創作,仲有加強版出現,連當事人都話惡搞得好精采。「網友嘅創作力同心思真係好犀利!哈哈!但係我拍嘅時候,就真係好辛苦,車廂入面好熱,我打到出晒汗!真係要多謝武術指導郭追,佢設計啲動作,出嚟嘅效果好好,我咁嘅身形打得贏四個男士,都有啲說服力。」

動作以外,劇集遠赴台灣取景,期間仲造就定欣同山聰嘅「婚事」,定欣話:「有一日我同山聰都放假,於是我哋就出咗去行街,去咗一間餐廳(山聰:「食燒肉嘅,佢哋有個promotion,如果啲食客係去慶祝特別嘅日子,好似生日或者紀念日,佢哋會全舖一齊拍手,仲好似送碟豬肉。」)送啤酒呀!

「咁我哋就話,嗰日係我同山聰結婚紀念日,餐廳啲人問我哋結咗婚幾多年,我就話十年,然後我哋就有免費啤酒飲嘞!但係最好笑係,當我哋食飽晒,隔籬搭枱嗰pair人,問我可唔可以同佢哋合照,我哋先知原來佢哋係香港人,俾佢哋目擊晒我同山聰啲貪玩嘢!」

「雙K」為Elaine同山聰喺劇中嘅名字(Kate及Kent),呢個組合深得觀眾歡迎,令兩位喜出望外。

 

為咗應付劇中嘅動作場面,定欣特別去學MMA同巴西柔術;演技方面,佢就大讚對手展鵬同鮑姐鮑起靜,令佢特別入戲。

 

 

 

Elaine話拍攝車廂打鬥一幕特別辛苦(上圖),而劇情出街後,網友將佢踢腿一幕惡搞,當事人仲笑指網友想像力豐富添!

 

同為「Crazy Runners」成員,Elaine同山聰喺劇中嘅「雙K」組合,零舍有默契。

 

堅好姊妹

o依家山聰同定欣有「唔咬弦」的話,二人都會話「離婚啦!」,足見佢哋感情之好。佢同Elaine仲乘勢催婚,山聰就回應:「我好努力做嘢,儲緊錢買結婚戒指o架嘞⋯⋯」

Elaine即刻表示:「如果陳山聰買咗一隻價值十五萬或以上嘅戒指求婚,我就考慮吓向鄭子邦(其男友)求婚啦!」

而暫時單身嘅定欣,就大讚山聰女友Apple。「我平時食咩都冇乜所謂,但就一定要飲吓湯水滋潤吓,『蘋果』啲湯水真係一流!而且佢哋兩個都係廚藝高手,我哋住得近,所以有咩靚湯好餸,我都有份歎!」

講到下廚,定欣同Elaine都表示自己並非高手,後者話:「我食素,煮嘅嘢有時好簡單,但係我好鍾意整甜品,尤其係蛋糕(山聰:「整個生日蛋糕俾我啦!」)睇吓你表現點先講!係都整俾定欣先啦!佢九月九號生日!錫啖先!」

好姊妹真係唔使多講,Elaine仲即時向壽星女送上Birthday kiss,相當有愛!

定欣同Elaine(左一及二),加上「胡說八道會」其他成員李施嬅、胡杏兒、胡蓓蔚同黃智雯(左三至右),喺即將播出嘅《胡說八道真情假期》中,將真姊妹情展現於觀眾眼前。

 

龍蝦鮮芒果羽衣甘藍沙律($195),選用優質波士頓龍蝦、芒果及羽衣甘藍,配上日式芝麻醬,健康美味又不失矜貴。

 

香煎意大利煙肉雞卷($105),特意揀選油脂甘腴嘅意大利煙肉,捲上了鹹香味濃嘅煙雞肉,經調味後再煎煮,口感香脆,味道甘香。

 

意廊特色手工薄餅($195),大廚以薄脆批底配上澳洲和牛、虎蝦及巴馬火腿,再加入四式芝士:Mozzarella、Gorgonzola、Parmesan及Cheddar Cheese,加上其他配料,層次非常豐富。

 

田園素食薄餅($128),香脆批底上鋪滿惹味多汁嘅香烤甜椒、蘑菇、鮮洋薊及茄子,味道多元化,感覺清新怡人。

 

火焰威士忌岩鹽焗36安士澳洲M6和牛斧頭扒($988),以優質岩鹽烤焗斧頭扒,上桌時澆上威士忌汁後點火,將肉汁鎖住。

 

黑松露野菌意大利飯($125),黑松露醬加上吸收咗高湯及忌廉燉煮嘅意大利米,配上鮮味野菌,味道濃郁可口。

 

扒龍蝦半隻拼野菌雞肉串燒($285),揀選鮮活嘅波士頓龍蝦,肉質份外鮮嫩及爽口彈牙,只以香草調味及用牛油烤焗,相當惹味。

 

焗火焰雪山蛋糕($88),焦香嘅蛋白霜外層,夾雜冰凍雪糕及鬆軟蛋糕,多重口感令人格外滿足。

 

Avanti Pizzeria 意廊 地址:灣仔莊士敦道211號地舖 電話:25723555