陳煒悶悶不樂做「女一」

早前，陳煒（煒哥）畀本刊獨家踢爆佢同台灣富商顏志行嘅婚姻玩完；之後，佢回應婚變時，就透露原來早喺五年前，兩人已經離咗婚。煒哥選擇三緘其口，之前仲搵埋「老公」上佢主持嘅飲食節目《煒哥的味道》，做騷扮恩愛，瞞咗大家咁多年，認真好好戲，下屆「視后」提名絕對冇難度！

雖然話已經離咗五年婚，但係終於被迫公開承認，少不免對煒哥嘅心情造成一定程度嘅影響。早前，東姑見佢去到深水埗，為擔正「女一」嘅無綫新劇《果欄中的江湖大嫂》開工時，就相當悶悶不樂，全程冇乜笑容。

加上，喺炎熱天氣底下拍外景，搞到個人嘅心情都寧舍煩躁。煒哥即使已經吹風扇兼不停抹汗，但同對手「綠葉王」劉江依然零交流；現場所見，佢一唔使埋位，就即刻攞埋外賣嘢食，上自己部私伙保母車度涼冷氣，好似嬲晒成村人咁嘅款。

即使煒哥已經久唔久就揸住把電風扇吹吓，又不停抹汗；不過，天氣酷熱，難免搞到個人「燥底」多二錢重。

未埋位時，笑容欠奉嘅煒哥，自己「柄」埋公園樹蔭底下乘涼。

煒哥對住幕後工作人員，一樣都冇乜好面色，仲不時一個人吽吽豆豆，好似心事重重。

中段休息時間，佢攞埋外賣嘢食，上自己架私人保母車度涼冷氣。

雖然已經離咗婚五年，但煒哥仲搵埋「老公」上佢主持嘅飲食節目，做騷扮恩愛，瞞咗大家咁多年，認真好好戲。