趙薇老公現身老蘭

趙薇嘅富商老公黃有龍，大有來頭，外間估計兩公婆身家高逾五十億人民幣，加上老婆係中國名旦，全世界人都識嘅明星，無論「黃總」去到邊，一舉一動自然受到大家嘅關注。換言之，趙薇等如有千千萬萬嘅民眾同傳媒，幫佢監察住，老公想「曳曳」都幾難！

東姑難得早前喺香港撞到「黃總」，身邊唔見老婆趙薇，同囡囡「小四月」，而係同一個四眼男結伴，喺熱門蒲點中環嘅蘭桂坊出現。雖然，佢喺香港嘅曝光率唔高，但有頭有面實有人認得，難怪佢去老蘭呢啲高度敏感嘅地方，都孖住條仔而唔敢畀異性埋身喇。不過，兩個「麻甩佬」梗係dry到冇朋友啦，見佢哋入咗間時裝店睇咗一陣衫，黃有龍似乎無乜癮，只係隨便瞄兩眼，匆匆來、匆匆去。之後，兩男再上咗一棟商業大廈，疑似傾生意，算係循規蹈矩，趙薇大可放心！

可能因為兩個麻甩佬行街，所以冇癮，東姑見黃有龍入咗「Y3」睇衫，都係求其睇咗陣。

黃有龍激罕喺中環蘭桂坊出現，身邊只得一個四眼男做伴，見佢哋頭岳岳，都幾dry下。

趙薇同富商老公黃有龍喺〇八結婚，育有一名七歲女「小四月」。