吳岱融58歲依然咁堅

九十年代當紅小生、現年五十八歲嘅吳岱融，舊年憑住《巨輪II》鷲哥一角再彈出，密密接劇做到冇停手，帶挈埋老婆鍾淑慧復出，兩公婆齊齊拍劇、做節目搵真銀。早排，吳岱融仲夥拍苗僑偉拍邵氏嘅網劇《飛虎極戰》，飾演大反派警司，外間有傳做佢下屬嘅三哥戲份被搶添！

日前，東姑去咗沙田曾大屋參觀，咁啱就撞到明星足球隊喺附近練波。雖然當日天氣熱到爆炸，但一眾波腳都冇偷懶o架，劉浩龍、吳岱融、關禮傑、黃日華同吳家樂通通都有到，而且個個背心上陣，大晒結實手臂，兼踢到身水身汗，東姑就大飽眼福；特別係快到花甲之年嘅吳岱融，依然可以帶波跑勻全場，比好多後生仔仲有心有力吖。

吳岱融除咗踢得之外，連副body都清減咗唔少。據知，「鷲哥」平時鍾意連續七日唔食嘢，只係飲水，話貪減得快，一次可以輕廿幾磅喎。而且咁樣，仲可以帶走埋身體多餘嘅毒素，唔怪之得望落依然咁型、咁firm啦！

舊年被本刊影到身懷豬腩肉嘅吳岱融，當日唔單只唔見咗個嚿腩，手臂仲幾結實大隻添。

五十五歲嘅黃日華，踢到半路，已經有啲頂唔順，要烏低身唞一唞氣。

早前喺《賭城群英會》「強姦」佘詩曼而hit爆嘅吳家樂，亦不停帶波左穿右插，戲內戲外一樣咁認真。