為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2017 年 09 月 08 日

虎媽柔情 袁詠儀

影后的成就,並非以獲獎次數去衡量,像早已把「事業重心」轉移至家庭的袁詠儀(靚靚),獎項俱只是雲煙。訪問這天,早了到場的她,要求提前進行訪問,有理由相信,當十歲的兒子張慕童(魔童)正值放暑假之際,歸心似箭也是理所當然。「我好傳統,女人畢生事業係個家,我廿幾歲就已經係咁諗。」

家庭是袁詠儀的中心,自兒子出世後,愈發激起她的「獸」性,兒子六個月大已被悉心栽培,學英文、普通話加上興趣班,千方百計為子鋪路入名校,甚至探路做義工,終於「虎」到盡頭,被丈夫張智霖一語點醒。「佢話讀邊間學校,係整定嘅。」說時還附帶一臉柔情。集慈母、賢妻、虎媽三大角色於一身,相夫教子,才是剛度過四十六歲生日的影后,最大的成就。

曾經是虎媽的袁詠儀,現在最想魔童有個愉快的童年。「我無後悔俾佢讀國際學校,雖然佢啲中文麻麻哋,但佢係一個好開心、思想好正面嘅小朋友,父母身教好重要,知識就交俾老師教。」

 

張智霖放假唔願飛,寧願留在家,於是袁詠儀就帶住魔童,母子遊世界。

 

喊住面試

袁詠儀不時被拍到帶着兒子魔童四圍去,只要她不用工作,全部時間就是陪兒子。暑假期間,她更作出特別安排,要仔唔要錢。

「今年我專登要六月十日收工,等暑假可以陪個仔,八月開學又要觀察一下,十、十一月至開始工作。我哋兩公婆好多時要去外地工作,其中一個都會盡量留喺香港,老公話個個月交咁多錢租,都想住吓間屋,佢放假嘅時候,連旅行都唔想去。」

自○六年魔童出世,袁詠儀的世界便徹底改變,她曾患上半年的產後抑鬱,與丈夫日嘈夜嘈,病癒後就開始全力培訓兒子。魔童六個月大,就開始要學普通話,聽普通話兒歌和國歌,之後上英文playgroup和興趣班。到兒子兩歲多,好奇心重又坐不定,她便部署他入讀心儀的漢基國際學校。

「我開始留意學校網頁,由幼稚園開始,要佢學多啲中文,我有朋友個仔喺嗰度讀,我就跟埋佢一齊去學校做義工,連續幾個月,日日去圖書館幫手包書!外籍老師鬼知我係邊個咩,我只係想老師、校長認得我。我又帶埋魔童,去接朋友個細路放學,等個仔開始熟習學校環境,可以自己入去面試。」

機關算盡,誰知棋差一着。「到面試當日,我個仔仲自己走埋去,拖住校長隻手,我就好叻咁同老公講:『呢鋪實食無黐牙,等我帶你參觀吓間學校啦!』點知轉頭,校長拖住我個仔,個仔喊晒咁,原來佢只認得地下操場,上到二樓考試,加上係由聘請嘅老師interview,佢就覺得好陌生。我見到我個仔喊,我都喊咗出嚟。校長話面試時,可以答錯或者話唔識答,但係喊就乜都答唔到,最後佢當然考唔到。」

袁詠儀汲取教訓,想出辦法,令魔童盡快克服面試恐懼。「我不斷帶個仔去見唔同嘅陌生人,個個問佢唔同問題,連去律師樓、餐廳都帶埋佢去,跟住佢就考到o依家呢間國際學校。佢面試時好合作,仲拖住老師隻手問幾時可以返學。」

回想當年,她也覺得自己太怪獸家長。「睇番以前,我都覺得自己黐線,真係冇咁嘅需要,老公一直都話,教仔唔可以太早教、太急進,所以o依家暑假會停晒所有興趣、補習班,淨係玩。」

只要張智霖在港,就會見到三人行街街,魔童最鍾意黐爹哋,父子拖到實。

 

袁詠儀坦言不許張智霖比自己早死,因為她不想看着自己最愛的人離開,愛情路上,她都有很傻很天真的一面。