為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 大英Blog物館 2010 年 06 月 08 日

黃國英

股壇名嘴,放棄高薪厚職,自立門戶幫客揸鑊鏟搵真銀,信念是「錢可以輸,信心不可輸」。

快餐二哥不斷升呢 大快活可長揸

大家樂(341)絕對是本地中小型股的經典,過去五年,連股息回報率達156%,而同期恒指及滙豐(5)的回報率為68%及負21%。被冊封為「十年股」,並非浪得虛名。「唉,如果以前識得買嚟長揸就好啦……」揼心口,呻到落葉,實屬例牌動作。但原來同期有另一隻股票,回報率多大家樂30個百分點,現價仍有近6%股息率,究竟係邊隻?無太大「懸念」:大快活(52)。

人的觀念,一旦形成,就很難改變。可口可樂和百事可樂,永遠都係可口可樂較受歡迎。無綫和亞視,就算做同一個節目,啲人都會睇無綫,唔睇亞視。揸恒生(11)就無大志,揸滙豐就會發達,但揸恒生五年,有得贏近三成。

盈利四年升三十倍

先入為主,很多人對大快活的印象,仍然停留在十幾年前,仲用緊小丑logo嗰個年代。服務態度、店面裝潢和食物質素,對比現在,落後頗多。到○三年新logo、換裝修、改菜單,逐步「升呢」,立竿見影,盈利拋物線上升:○四年賺三百萬,進步到○八年賺一億,升近三十倍。

但往績好,不等於將來一定得。大快活的營運,理論上有三大隱憂:第一、食材成本上升;第二、租金上調;第三、最低工資立法。為了解實情,我們早前拜訪了公司管理層。

食品價格急升,公司在○八年已見識過,對策有三:首先,透過全球採購,以節省支出,如內地豬肉價貴,則取巴西、美國;其次是靈活調動餐牌選項,成本一增,即換出場,改以後備入替。據管理層表示,沒有任何一項食材佔成本一成以上,換句話說,就算部分食品飛漲,亦不致受創太深。此外,大快活去年年底於大埔的中央廚房啟用,統一處理、輸送食材,減低浪費的情況,並節省店面人手,成本自然下降。中央廚房亦負責研發菜式,以便經常推陳出新,順道加價。

租金高企,是零售、飲食業的大敵,管理層亦直認不諱。大快活每年約有三分之一的舖位會重新議租。為達致雙贏局面,公司將部分租約轉為「固定租金+營業額分成」的模式,減輕租金作為固定成本的壓力。當然生意好時,租金會較高,但硬幣的另一面,是一旦出現沙士式絕世天劫,可減低傷害性。利害相衡,除笨有精。

面對食材成本,租金及工資上升的壓力,大快活管理層積極作出應對措施,使公司盈利前景可望看好。

最低工資影響不大

最低工資立法會增加公司成本,但幅度未必如想像中高。大快活在港聘請的三千多人中,因新法例而需加薪只有數百。據公司自行評估,影響未算嚴重。公司今年計劃在國內增快開新店的步伐,如能成功執行,會是業績的x-factor。

零息世界,食息一族苦無出路,大快活可堪考慮。同事家人,行落銀行,為了多賺少許利息,被人o氹落叠,買高收益債券基金,現在震過貓王,日日擔心老本安危。每日中環各大銀行,迷債和ELN苦主,打鑼打鼓奏哀樂,為的是討回血汗錢。花時間研究一隻自己不一定買的收息股(因為買唔到size),為求幫金融業,積點陰德。