為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2017 年 08 月 31 日

怡然自得 李怡

家中一屋都是「商台人」,入職電台似乎已成為必經之路,不過廿八歲的李怡(野人),卻寧願成為家中異數,早已另謀出路。

母親林珊珊 、舅父林海峰、林曉峰 ,甚至胞姐李澄(西瓜),都在商台出身做DJ,身為家中孻女的野人,卻對開咪零興趣,反而喜愛透過心靈感應,與萬物溝通,先後修讀過動物傳心及能量治療課程,早前更成為瑜伽導師,開班教學。「自從讀完書之後,我一直都搵唔到人生方向,轉過好幾份工,搞到成個人好虛幻。直到我接觸咗(動物傳心及能量治療)之後,學識點樣帶走負能量,成個人氣色好咗好多,加上做瑜伽令我身心平靜,係個好好嘅治療渠道,俾我洗滌心靈。」

李怡花名野人,原來有段古:「我個名叫李怡,係有怡情養性嘅意思,因為我細個係個忟憎嘅BB,又好遲先識講嘢,加上頭髮向上生,淨係識得嗌,所以屋企人就叫我做野人!」

 

野人家中養了狗仔Bilu,但她坦言無法與愛犬做心靈溝通:「我同唔到我隻狗傾偈,因為有偏見,會放咗自己嘅諗法落去,所以會唔準。」

 

動物傳心師

雖然沒有入行做DJ,但野人一樣遺傳了家族基因,相當健談。於香港長大的她,早年於Kowloon Junior School中七畢業後,放棄入讀大學機會,提早出社會,擔任獸醫助護。

「我見好多人讀完書,出嚟都唔係做嗰行,我就諗不如早啲出嚟社會,體驗生活。我一向都好鍾意小動物,中七畢業後,透過爸爸(李啟淦)介紹,去咗做獸醫助護,幫手照顧啲貓貓狗狗。有時見到啲驚嘅動物,例如蛇,都要照樣處理,但我做咗一、兩年之後就無再做落去。」

放棄理想職業,皆因現實不似預期。「初初接觸呢行,以為幫手照顧啲動物,個主人會好感激我,但事實上當面對動物嘅生離死別時,我一邊要安撫主人嘅情緒,轉個頭自己就走入廁所喊,太過影響我嘅心情,就連返到屋企都仲會諗住呢件事,我接受唔到。」

面對動物生離死別,野人心有戚戚焉,因為修讀過動物傳心課程的她,能與動物心靈感應。「十三歲嗰年,我同屋企人去旅行,騎馬嗰陣,我感覺到隻馬好肚餓,於是心入面就叫隻馬不如行快啲返去食嘢啦,結果佢真係行快咗,我覺得好神奇。大個咗之後,就走咗去學動物傳心。」

她更會幫朋友的寵物做心靈導師。「嗰陣我啱啱讀完個course,想睇吓work唔work,咁啱身邊有個朋友領養咗隻狗,問我隻狗以前發生過咩事,我就叫朋友俾張狗仔嘅相同個名嚟,但唔好話任何背景資料俾我聽,我試吓感唔感應到。

「結果我講中咗好多嘢,例如狗仔鍾意玩咩玩具、習慣企喺某個地方,知道原來隻狗以前曾經被人喺指定時間,喺某個地方騷擾過,所以佢成日都喺同一個地方吠,之後我都有一路同啲狗仔溝通。」

九一年,野人與父親李啟淦(前香港游泳代表隊隊員)及胞姊西瓜,慶祝兩歲生日。

 

(右起)野人與母親林珊珊及胞姊西瓜感情很好:「媽咪唔係一個虎媽,佢一向都對我哋唔嚴。」