為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 08 月 25 日

郭紹傑被踢出會 爆退職工盟疑雲

港九拯溺員工會前主席郭紹傑,早前畀會方DQ,永久刪除會籍。工會喺臉書發聲明話,郭紹傑高度參與社會運動,違反公務員政治中立原則,又唔聽勸告以工會身份向傳媒發言,所以作出呢個決定,但係就連主席黎炳坤都話唔知情。有工會理事透露,該會被建制及本土派割據,與職工盟漸行漸遠漸無聲,以致身兼職工盟成員嘅郭紹傑被踢出會。

據悉,郭被DQ嘅聲明係幾個工會嘅臉書管理員,自把自為發出嘅,事前並無經過工會表決,直至上周中先召開理事會,以十比四正式通過DQ郭紹傑,「有啲新派會員覺得佢係工會入面嘅噪音,想消滅佢,但操之過急,無跟程序就搶先公布。舊派會員係唔會咁樣清除異己。」有工會理事說。

呢名工會理事口中嘅「新派」係指,新加入嘅理事成員,佢哋有啲係建制有啲係本土派背景,「舊年改選理事會嘅時候,突然多咗三十幾個人出嚟選,以往都無咁踴躍,佢哋好團結咁一齊將郭紹傑踢出理事會。」消息人士話,之前有西貢救生員罷工,郭紹傑出嚟發言,令工會覺得好難堪。直至今年五、六月,工會兩度發聲明同郭紹傑劃清界線,話佢已經唔再係工會理事,叫佢唔好再擅自代表工會。

郭紹傑接受本刊查詢時話,佢落選後發言都係用資深救生員身份,批評工會係未審先判,仲話該會已被建制及本土派人士入侵。工會發言人胡啟榮就話,「呢個現象好正常,如果偏向反對派先奇怪。」

眾所周知,港九拯溺員工會一直係職工盟嘅屬會,過往示威活動舉牌亦都有職工盟標誌,直至今年,工會新聞稿上面嘅職工盟標誌開始消失,含意耐人尋味。該會同建制愈行愈近都有迹可尋,上周工聯會何啟明喺臉書貼相,話自己陪同港九拯溺員工會去立法會同政府開會,可見工會轉莊都幾勢在必行。

不過,職工盟副主席張麗霞否認,港九拯溺員工會已脫離職工盟,「佢哋工會代表早幾日仲同我哋開會,態度好誠懇。」對於郭紹傑被踢出會,佢話要留番畀屬會自行決定,職工盟本月尾先會就事件回應。

有近五十年歷史嘅港九拯溺員工會,經常舉行活動爭取救生員福利,但最近該會卻指參與社運,違反公務員政治中立原則。

 

郭紹傑以往不時發起救生員抗爭行動,但佢早前畀會方永久刪除會籍。

 

工會以往嘅新聞稿(左)都有職工盟嘅標誌,但今年初起,該標誌被消失。