為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 08 月 24 日

發叔長眠龍鼓灘 揭祖墓「猛虎跳牆」風水局

人稱「新界王」嘅鄉議局前主席劉皇發上星期出殯,政商名人都親臨弔唁,向呢位新界巨人作最後致敬。最後,發叔同佢父母及爺爺,同葬喺白海豚山,據悉發叔生前已經睇中呢幅福地。

據講,發叔揀呢度同佢發達祖墳有關。發叔嘅子姪憶述,發叔深信上三代太公劉惠來嘅墳地,係助佢撈到風生水起嘅主因。所以發叔在生時,每年清明、重陽和太公生忌例必親自上山掃墓,年過七十仍風雨不改,○六年更出錢重修祖墳。

本刊搵埋研究圍村風水多年嘅民族考古員周樹佳,研究吓發叔太公嘅風水旺地。原來佢位於北朗村後叫「龍船石」嘅險要山崗之上,隱沒喺石罅之間,被風水師稱為「猛虎跳牆」格局。

呢個墳喺一九三五年建造,第二年發叔就出世,盡得太公庇佑,祖墳被窮山惡水和硬石包圍,係生龍旺富貴嘅風水局,周樹佳說:「硬石頭出硬漢子,結果造就權傾朝野嘅新界強人。」而o依家發叔福地所在處正正係「猛虎跳牆」嘅牆,食正旺氣。

發叔上星期三設靈,過百名政商界名人皆有出席,第二日大會舉行三場公祭,同樣吸引過百名鄉紳上香弔唁。

 

發叔靈柩於上周五五時半正式落葬,落葬前全體親友向靈柩鞠躬,再撐起黑傘為發叔遮光。周樹佳指「落葬位置左邊仲有一個位,留畀發嫂百年歸老用,足見鶼鰈情深。」

 

發叔的寶穴位

 

發叔父親劉天生的墓就在附近,墳前有八細一大的石珠,猶如鯉魚吐珠,作用係化解對面發電廠嘅火氣。墳頭仲有一對對聯,分別以「龍」及「鼓」字開首。

 

發叔太公的祖墳位於龍船石山頂下約百多呎,周圍盡是奇石,而且被樹木遮蓋,常人難以到達,「十年前上山兩次先搵到,發叔生前年年上去三次。」周樹佳說。

 

前特首曾蔭權伉儷都有出席喪禮,送發叔最後一程。

 

發叔靈柩選用頂級金絲柏香木,重約九百磅,由董建華、林鄭月娥、張曉明、張學明、陳智思等星級猛人扶靈,之後再由三十二名大漢輪流托上山安葬。

 

罕有客家傳統習俗出殯

發叔出生於屬客家圍村嘅龍鼓灘村,大殮落葬儀式亦跟足客家傳統,有大學更專程派員全程拍攝,為這項非物質文化遺產作詳細紀錄。民族考古員周樹佳當然亦唔放過今次大開眼界嘅機會,佢話:「廿幾年都未見過咁大型嘅客家葬禮。」劉家請來本港有名嘅客家喃嘸師傅牛哥主持儀式,用客家話唸佛經,部分儀式同普通嘅道教喃嘸唔同,「無跳火圈、過橋等,破地獄只會用沙圍成圈,撥開一個缺口。」

據發叔嘅堂弟劉伯所講,發叔出身圍村,所以過身亦要跟足圍村規矩,落葬之後神主牌會放喺位於龍鼓上灘嘅劉氏宗祠,與同村先人一齊。原本龍鼓灘村叔父打算用客家最高規格嘅「雙白麒麟」恭送發叔上山,彰顯發叔嘅地位,但因為搵唔到識得舞麒麟嘅師傅而取消,「研究咁耐未見過會做白事嘅客家麒麟,香港無人識舞都唔出奇。」周樹佳說。

不過上山時,喃嘸樂師全程吹奏舞麒麟的音樂,盡量保留傳統特色。

發叔今次選用佛教儀式,據指喪禮請來寶蓮寺嘅智德法師主持,大殮落葬的法事則跟足圍村傳統,找來客家喃嘸師傅牛哥(紅袍者)主持。