為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 08 月 20 日

蝴蝶飛 向海嵐

參演的舞台劇《我和青天有個秘密》導演陳恩碩只有十九歲,向海嵐對此既佩服又感觸。

「佢(導演)咁細個,但已經可以創作晒成齣劇,仲要寫晒劇裏面三十首原創歌嘅曲同詞,又有領導能力,乜都兼顧晒,好犀利!但係我十九歲嗰陣,只係返學、放學,同同學去卡拉OK、去行街買衫,入大學選乜嘢major呢?是但啦!根本冇諗過將來自己要做乜!」

結果,九八年她畢業後便選港姐去,摘下后冠成為了藝人。下年她便入行二十年了,當中有一半時間,都是在無綫度過。她形容,那段日子,自己猶如受到全天候保護,幾乎沒有甚麼要煩惱。

「太過受保護,變咗好多嘢都冇需要我去理,感覺好似:咁就十年啦?我覺得自己眼界唔夠開,好多嘢都好局限。」

然後,她走出了那個comfort zone,選擇了獨個兒到上海當OL,重新開始另一種生活。「喺上海呢幾年,我喺瑞安(朱玲玲丈夫羅康瑞的公司)做客戶關係管理。我覺得成個人放鬆咗、放開咗好多。以前我唔係太識同人講嘢,畀人感覺好靜,o依家我雖然都唔係好識(和別人溝通),但起碼……識過以前少少啦!哈哈!」

就像一隻剛破繭的蝴蝶,眼前的向海嵐,明顯心花開了,沒有了從前當花旦時的拘謹,說到無奈時便表現無奈,想笑時便開懷大笑,前路如何沒關係,她正在學習飛得更好。

 

 

參演《我和青天》,向海嵐坦言,可以拍着蔣志光(中),以及一位只有十九歲的全能導演陳恩碩(右一),得着很多。「唔使我綵排嗰日,我覺得好不被重視o架!哈哈!」

 

代表作

向海嵐九八年當選港姐冠軍後,便順理成章成為了無綫力捧花旦,回首看,那些外景接廠景的拍劇日子,的確很忙。

「嗰陣試過一個禮拜,我只係瞓咗八、九個鐘!我同爹哋、媽咪住,但嗰個禮拜,大家住埋同一間屋,都可以見唔到面,真係返去沖個涼、換件衫,又出去開工!係辛苦o架,但我又好享受咁忙,覺得好充實,因為我幾鍾意將啲嘢排到滿晒,每日都有嘢做。」

若論那十年所帶來的名成利就,她很清楚或許比不上某些同是港姐出身的女藝人,但至少她很感恩也很滿足。「可能我真係冇邊個邊個咁紅、咁勁,但係,我下年入行廿年,o依家出到嚟,啲人仲會記得我係『楊貴妃』,仲有《無頭東宮》,對我嚟講,已經係代表作呀,所以我係好感恩o架!

「試過喺網上面,有人會因為我喺《刑事偵輯檔案》裏面,搶走咗原本同宣萱一齊嘅古天樂,留言同我講:『芊芊(《刑》劇中她的角色),點解你要搶走古天樂呀?』哈哈哈!which is十幾廿年前嘅劇,但佢哋到o依家都會咁肉緊,都算係我一個小成就呀——雖然我唔知人哋認唔認同呀吓!哈哈哈!」

 

 

九九年,她首次擔正做女主角拍《楊貴妃》,讓觀眾留下了她古典美的印象。「《我和青天》個導演都話,佢係細細個睇我做戲,對呢套劇好深刻,所以先搵我做。」

 

九八年,向海嵐(中)以大熱姿態當選港姐冠軍,季軍為吳文忻(右),亞軍為趙翠儀(左)。