李克勤老蘭快閃

九月就會喺紅館開個會嘅李克勤，早排被本刊影到一家四口游水。輯相影唔到克勤有肚腩，仲好鬼fit添，所以佢就冇乜嘢；之但係佢老婆盧淑儀睇完就嬲嬲豬，東姑斷估李太係介意被影到，喺泳池舉腳晒長腿囉。不過，正如克勤所講：「佢（老婆）嬲咗三日⋯⋯」 之後，盧淑儀又繼續同老公仔密密去沙灘游水，同陽光玩遊戲，仲喺自己嘅社交網貼出泳衣相添。

其實，克勤平時真係好少畀人影到逛街嘅相，但係日前嘅一個晚上，竟然畀東姑撞到佢喺蘭桂坊出現，身邊仲要冇老婆喺度，唔通佢想喺開show前鬆一鬆？當時，疑似蒲完嘅克勤，可能怕畀人認得，一路行一路頭耷耷，仲要愈行愈快，大約行咗三個街口，原來一早已經有架七人車停泊等候佢，於是，佢極速跳上車後就絕麈而去。

日前，東姑發現克勤一個人喺蘭桂坊出現，一路行一路頭耷耷，慌死畀人認出。

佢急急腳咁行，一直行咗三個街口，然後好快咁跳咗上架七人車，跟住絕麈而去。

近日，克勤同老婆盧淑儀密密去游水，仲喺自己嘅社交網貼出合照「放閃」添。