為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 08 月 06 日

執子之手 王賢誌

這個訪問出街之時,王賢誌(Vinci)與他的另一半周思聰(Kevin)正身在郵輪前往沖繩,慶祝他們八月一日結婚一周年紀念。Vinci說,他跟Kevin自○九年開始走在一起,去年這天之所以成為了二人的大日子,一切都是心血來潮。

「上年七月,我哋同屋企人返溫哥華,我book機票、酒店嗰陣,突然醒起加拿大(同性)可以註冊結婚,橫掂都係返去,不如結婚啦,反正我係半個加拿大人,喺嗰邊生活過八年,而且我屋企喺嗰邊仲有屋有車,叫做有個竇,唔似去啲三唔識七嘅地方旅行結婚咁呀。咁Kevin又肯喎,我哋咪喺嗰兩、三個月籌備婚禮囉!」

正如決定結婚一樣,他們不想刻意營造,也不想大事鋪張,只想愛得自然自在,故最後婚禮只低調地邀請了五十位親朋戚友。「成件事反而仲warm啲、close啲,起碼我哋可以同嗰五十個人,逐個坐低傾偈、影相、食嘢,我哋到o依家都仲好深刻嗰日嘅所有畫面。」就是象徵着二人關係的一對Cartier婚戒,亦不過萬多元港幣。「我哋只係想要啲好plain嘅款,呢隻金色係Kevin揀嘅,戒指裏面就刻住我哋嘅相連名『KEVINCI』。」

訪問這天,仲夏的陽光映照着大地,不時吹來一陣陣溫柔的微風,但見Vinci說着另一半時,總會不經意地輕摸着無名指上的婚戒,流露出甜蜜的笑容——兩個人的幸福,其實就是這麼簡單。

 

 

 

 

唔想做戲

王賢誌說,早在自己很小的時候,已肯定了個人的性取向。「唔會疑惑o架,尤其是到咗十二、三歲,有偶像,又開始有自己嘅幻想,咁個對象係乜嘢,冇得呃嗰喎!同埋我一路以嚟,都冇試過對女性有興趣,咁我覺得我係攣嘅,都唔會係錯啦!」只是他一直沒有遇過同道中人,不能讓他有坦然的機會。

直至九四年加入了無綫沒多久,一次因為心情不佳,便直接向家人表白。「嗰晚我係一次過將所有嘢講晒出嚟,我承認係有啲自私嘅,但係我唔想講大話,唔想做戲。其實住埋一齊咁多年,屋企人點會睇唔出啫?趷起條尾都知你做乜啦!只係一直冇機會三口六面講清楚咋嘛。

「不過我嗰晚講咗出嚟之後,第二日瞓醒,一切都係好似以前咁冇分別,因為我當時冇拍拖,又冇話要即刻出去識人,如是者十幾年都係呢個狀態,我覺得對我屋企人嚟講,係一段好長嘅緩衝期。」

那父母可有為此很傷心嗎?「佢哋當然有唔開心,仲問我:『係咪冇得改番o架?需唔需要睇醫生呀?』但係我一直都覺得佢哋係比較開通,同接受新事物嘅人,你諗吓,我哋當年移民去加拿大,我爹哋係最早期做矯正近視嘅人,你就知佢其實好前衛!」

 

 

Vinci今天的幸福,多少都是因為家人背後的支持, 圖為十多年前的全家福,Vinci身旁為他的兩個妹妹王賢慧和王賢德, 前排為父親王氏港建集團主席王忠桐,及母親胡麗明。