為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2017 年 08 月 02 日

彭皓鋒培訓太空人智慧

「綠葉王」、彭家麗嘅細佬彭皓鋒,喺無綫捱咗十六年,一直被投閒置散;喺一二年,佢毅然離開大台,之後過檔港視拍《警界線》及now拍《衛夫子》, 近年就轉戰大陸市場。舊年,佢嘅演技終於受到肯定, 憑住大陸網絡電影《老師上錯身》,獲得美國電影節「US Hollywood International Film Festival」頒發最佳男配角。當時,佢就有感而發, 喺Facebook貼文感慨話:「 做了二十年終於有一個真正的肯定。」

最近,彭皓鋒同東姑講佢有新搞作,就係喺荃灣南豐中心開咗間「小飛船潛能啟發社」,最大賣點就係同美國太空總署嘅工程師合作,設計多種啟發潛能嘅課程,培訓太空人嘅智慧,並由外籍老師教授,佢坦言:「有好多人以為我開咗呢間中心,諗住轉行唔拍戲;其實,我係超級鍾意拍戲,唔會因為任何嘢而放棄!」彭皓鋒透露呢間教育中心投資咗六位數字,只係小本經營,所以一有時間就會親力親為,負責執頭執尾咁話。

日前嘅一個中午,東姑去咗佢舖頭(目及)下,發現彭皓鋒親自鎮守,吸引到唔少家長入內查詢課程,有啲更加攞埋表格,準備申請入學;其中有一位家長心急到要即席報名,睇嚟幾受歡迎噃,冇白費佢嘅心機。

彭皓鋒最令人印象深刻嘅演出,就係喺無綫劇集《大太監》裏面,飾演米雪個細佬,有機會同視帝黎耀祥同場較量演技。

 

彭皓鋒係歌手彭家麗嘅親生細佬,佢哋兩個感情好好,仲經常聚會,增進姊弟情。

 

因為間教育中心只係小本經營,所以彭皓鋒一唔使開工, 就會落去幫手執頭執尾。

 

彭皓鋒話自己嘅小朋友都有參加呢個課程,仲學識咗好多英文添。

 

啲小朋友玩完啲玩具之後,亂咁放,彭皓鋒都會親自執拾,不假手於人。

 

因為正值暑假期間,所以不時有家長,到彭皓鋒嘅教育中心詢問及攞報名表格。