為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 07 月 27 日

黃碧雲「鬆章」通過教育撥款 激進溫和內鬨升級

劉小麗、梁國雄、羅冠聰及姚松炎被法庭撤銷立法會議員資格之後,激進泛民向政府宣戰,揚言要喺上周三財委會最後一次會議上,阻撓三十六億元教育撥款通過。據悉,會前各界預咗教育撥款勢必有險阻。豈料,教育等六項撥款最終獲通過,已經比建制派預測嘅數量為多,最大「功臣」竟然係民主黨議員黃碧雲。

事關,黃碧雲喺會議膠着之際,提出臨時動議,將表決響鐘時間由五分鐘縮至一分鐘,令激進泛民無得再瘋狂拉布。當日,除咗黃碧雲成箭靶,泛民教育界議員葉建源亦受千夫所指,因為葉建源唔想撥款一拖再拖,有意無意「鬆章」畀政府。

激進派朱凱廸睇到扯晒火,會上不點名寸爆葉建源,「唔好因為少少業界利益,就忘記公眾期望議員爭取資源要由市民分配。」葉建源不甘示弱反駁:「撥款係教育界多年訴求,唔好理解為政府嘅小恩小惠。」雙方唇槍舌劍,火藥味極濃,最終撥款獲批。

據悉,事後幾日黃碧雲成為激進泛民嘅眾矢之的,喺民主派會議嘅whatsapp群組度被鬧反骨,姚松炎帶頭寸爆黃碧雲係建制派嘅「最佳拍檔」。但溫和派就幫黃碧雲講好說話:「如果佢唔咁做,教育撥款通過唔到,後果邊個孭?」滿身冷箭嘅黃碧雲多次強調係「急市民之所急」,又揚言「笑罵由人」。

雙方展開激烈罵戰,據了解,民主黨主席胡志偉曾發文帖,代黃碧雲向泛民各路人士道歉,但卻惹起民主黨員不滿,最後胡志偉被迫刪除該道歉文帖。

呢一幕令激進派與溫和泛民嘅貌合神離徹底表露出嚟,有消息人士指出,DQ一役後兩派人內鬨加劇,激進派「主戰」,主張要同政府玩對抗;但溫和派就主張要平衡民生利益。溫和派消息人士說:「教育界係民主派嘅票倉之一,今次教育撥款對業界有利,如果唔諗辦法畀撥款通過,之後點同選民交代?」

激進與溫和派始終唔係同一個政治光譜,彼此代表嘅選民、路線迥異,要佢哋團結一致都幾難,「泛民口和心不和,莫講話要協調補選名單,十月復會後重奪議會主導權都難。」

黃碧雲喺會議膠着之際,提出將表決響鐘時間由五分鐘縮至一分鐘,有「鬆章」畀政府之嫌,泛民議員群起指罵佢。

 

朱凱廸(左)等激進派不滿民主黨為政府「助攻」,令三十六億元教育撥款順利通過。

 

據悉,民主黨主席胡志偉曾為黃碧雲嘅舉動,向泛民各黨致歉,卻引起黨內成員不滿,胡速速收回道歉文帖。