為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 07 月 20 日

壹週刊賣盤 黃浩付一千萬簽臨約

創刊廿七年嘅《壹週刊》,係壹傳媒進軍傳媒界嘅踏腳石,近年銷量不斷下滑,多次傳出停刊或賣盤消息,但老闆黎智英「肥佬黎」信誓旦旦表示死都唔賣這個「親生仔」,更揚言:「賣咗(旗下刊物)我一世變契弟!」

一五年,《壹週刊》遣散並裁員三十人,及將公司旗下其他雜誌合併出版。本周一,適逢係大裁員兩周年,壹傳媒董事局突然公布集團賣盤,展開正式協議之磋商,將《壹週刊》連同已停刊嘅《忽然一周》、《Face》等雜誌,打包賣畀一間名為「W Brothers Investment Ltd 」嘅公司,據指台灣《壹週刊》亦在其中,估價共五億港元。

同日,集團管理層召開員工大會,據悉該刊總編黃麗裳及多名老臣子,感觸落淚。在場員工無奈之餘,抽秤「肥佬黎」當年嘅「契弟論」問:「o依家係咪承認做契弟?」管理層未有交代日後嘅編採方針及會否裁員,員工大感前路茫茫。

有趣嘅係,買家正係肥佬黎早年話死都唔賣畀佢嘅《E週刊》老闆黃浩。不過,仔細睇份通告,卻未睇到屬正式出售協議,而係一份「指示性要約」,類似買樓畀訂嘅臨時協議。據財經界人士分析,買樓都要畀百分之五嘅訂金,「假如真係估值五億,黃浩應該要攞二千五百萬出來,o依家只係畀一千萬咋。」據悉,黃浩呢一千萬係「誠意金」簽臨時買賣合約,今年底前,黃浩可優先同壹傳媒傾賣盤,如果壹傳媒最終賣畀其他人,就要退錢畀黃浩;相反如果黃浩打「退堂鼓」,呢一千萬壹傳媒就袋袋平安。

雖然佢哋行政總裁張嘉聲話希望九月最終落實,但有消息指,黃浩簽咗約,先慢慢搵金主投資。咁樣睇嚟,雙方一日未簽正式合約,一日仲有變數,壹傳媒咁都肯簽,可見該集團有幾想賣甩《壹週刊》。

壹傳媒近年業績大倒退,一六及一七年度分別虧損三億二千萬及近四億元,早前更推出「優離計劃」將集團的美術、攝影等工作外判。阿媽唔掂,阿仔亦唔好得去邊,《壹週刊》嘅廣告收益低處未見低,由一五年度的近兩億元,跌至一七年度僅五千七百八十萬元。

《壹週刊》等刊物被賣予黃浩,員工抽秤肥佬黎當年嘅「契弟論」,批評佢背棄承諾。

 

壹傳媒管理層召開員工大會講解賣盤情況,但未交代日後嘅編採方針及會否裁員,員工對前路感迷茫。

 

周一正身處日本嘅黃浩出post,表明已準備入主《NEXT》。

 

壹傳媒董事局公布集團就《壹週刊》等雜誌賣盤展開磋商,但未正式落實出售協議。