單飛C密
幾多隊持續唱到幾多歲？當C AllStar四子都宣布休團作單飛發展之時，我就誠邀佢哋擔任今次「Paco巨星飯堂」嘅嘉賓，俾成員梁釗峰、陳健安（On仔）、吳崇銘（King）同何建曦（Jase），先預告10月舉行嘅演唱會環節，再公開作個人發展嘅大計。
我帶四子去到位於灣仔嘅「日熹樓」，品嘗高質嘅傳統京川滬菜，暢談佢哋休團前後嘅私搞作。
10月舉行一連兩場嘅《生於C AllStar演唱會2017》後，C AllStar將會休團作個人發展，Jase、On仔、阿King同釗峰（左至右）四子預告，兩場演唱會將會有唔同嘅歌曲組合，一次過滿足自己同樂迷嘅要求。
唱後休團
早喺今年初嘅頒獎禮上，C AllStar四子預告明年會單飛各自發展，成軍8年，外界慣咗佢哋係四位一體，所以嚟緊喺10月舉行嘅《生於C AllStar演唱會2017》，就順理成章地成為佢哋休團前嘅「最後一擊」。
一講到演唱會，On仔就立即解釋：「今次演唱會叫『生於C AllStar』，除咗關於C AllStar之外，仲有『生於斯』嘅意思，我哋係生於香港，都想傳達自己對呢個家嘅心思。」
釗峰補充：「今次係我哋休團前嘅演唱會，所以我哋都想唱晒平時live冇唱嘅歌，所以兩日嘅rundown係唔同嘅。至於唱咩『遺珠』，我哋就諗住好似之前投票揀solo成員咁，俾fans透過網上投票選出。」
經投票贏到演唱會solo時段嘅Jase就話：「為咗答謝投我票嘅fans，我喺嗰15分鐘嘅solo時段一定更加落力，表演內容暫時要保密，咁到時先會有驚喜。」
阿King就會化身DJ，「我會喺紅館開一個短party，用EDM（Electronic Dance Music、電子舞曲）帶動氣氛，仲會重新編排一啲歌，咁我哋同觀眾都可以一齊跳！」
我帶C AllStar去到位於灣仔嘅「日熹樓」，品嘗高質嘅傳統京川滬菜，暢談佢哋今年休團前後嘅搞作。
作為休團前嘅最後一擊，C AllStar四子喺10月舉行嘅演唱會中，必定施展渾身解數。
必食六小碟包括（左上至右下）：醬爆雞絲（$68）、夫妻肺片（$58）、經典肴肉（$58）、京城拌三鮮（$78）、七里香醉鴿（$108）及麻辣魚肚絲（$78）。
水煮五寶（$398）包括雞、黑豚、牛、羊及斑片，可自由配搭。
個人作業
講到EDM，就不能不提對阿King影響甚深嘅雷頌德。「我受Mark Lui影響好深，當時佢同Paco你造咗好多EDM，Kelly（陳慧琳）唱嗰啲就最深入民心。我希望休團之後，可以多啲喺呢方面發展，帶動番EDM喺香港嘅潮流。我好enjoy打碟嘅時候，見到啲樂迷因為我打嘅歌而情緒高漲，睇到佢哋high，我都好high！」
另外三子都已有休團後嘅計劃，On仔話：「我想專注喺創作上嘅工作，除咗為我哋寫歌，我都想同其他歌手合作，我覺得有時收到『功課』嘅時候，創作過程會特別多靈感，完成份功課嘅時候亦特別有滿足感。」
Jase就準備同我做「同行」——做食家。「我以出書為目標，一本就講香港嘅出色餐廳，平貴都有，另一本就關於旅遊嘅。o依家我喺ig推介一啲我試過覺得正嘅餐廳，Paco你係麵神，我都好鍾意食拉麵，最近就試過兩間小店，一間喺銅鑼灣叫『Vegi』，另一間叫『Zagin Soba』，喺跑馬地，兩間嘅共通點係由湯底、麵質、叉燒，所有嘢都一絲不苟，係值得去試。」
On仔（左）同阿King都表示，作個人發展後仍會以音樂為重心，前者享受創作，後者就希望再帶起電子舞曲嘅熱潮。
做開gym嘅On仔，仲會自己煮健康餐，雙管齊下先keep到靚肌身形。
迷上打碟嘅阿King，早前喺「2017荔枝音樂節」大顯身手，嚟緊嘅紅館演唱會，都有佢嘅DJ環節。
麻辣炒蟹（$368）以肉蟹製作，麻辣配料更能帶出蟹嘅鮮甜。
黑豚海參鮑魚煲（$398），選用墨西哥鮑魚炮製，全部材料以秘製醬汁炆煮，夠晒入味。
炸八塊（$238）為古式京菜，師傅依照雞隻紋理分件八塊，以先蒸後炸方法處理，外脆內juicy。
隱秘食神
一講食，釗峰就話：「我諗我係兄弟之中，對食最唔講究嗰個，一定冇『拉麵哥』（Jase）咁專業！不過我好鍾意香港傳統嘅冰室同茶餐廳，一杯好飲嘅奶茶，其實一啲都唔易搵，個茶底一定要有水準，先沖得到正嘅奶茶。我鍾意上環海安咖啡嘅奶油脆豬，仲有深水埗老鳳嘅黑松露炒蛋，配埋奶茶⋯⋯真係一提就想食！」
聽到釗峰嘅「食經」，就會發現佢對食都有一定要求。「On仔先係食家！佢仲係廚神嚟o架！」
On仔表示：「因為我做gym，咁好多時要計熱量嗰啲，所以自己煮就最方便。我通常係上網搵食譜煮，焗飯係最常煮嘅，整好晒啲料放入焗爐就OK。最近就常煮雞柳秋葵啤酒焗糙米飯，雞柳就用豉油腌、秋葵切粒，以啤酒代替水用嚟焗飯，焗45分鐘就食得，啲飯仲有淡淡麥香。」
Jase（右）喺網上選舉中，贏得演唱會solo環節，釗峰尊重民選結果，仲話對兄弟嘅演出十分期待。
雖然釗峰欣賞傳統冰室嘅美食，但係佢早前都有去食素漢堡，仲有喺ig同網友分享。
變身「拉麵哥」嘅Jase，試過眾多拉麵後，推介位於銅鑼灣嘅「Vegi」，仲俾埋貼士話晚上九點後先係餐廳嘅拉麵時間。
麻辣海參燴飯（$128），帶麻辣味嘅雞柳、帶子、海參等材料，混合炒飯，鮮香惹味。
羅春閣生煎包（$48、前）同日熹樓灌湯小籠包（$43、後），湯汁豐富，令人回味。
嚟自西環老字號「源記」古方嘅糖水，蓮子桑寄生蛋茶（$36、前）同杏仁茶（$26、後），滋潤養生。
日熹樓
地址：灣仔杜老誌道6號群策大廈4-5樓
電話：25111534
