為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 07 月 12 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

分享資源 共享經濟

有市場報告顯示中國嘅流動支付市場已經達到美國嘅五十倍,中美流動支付嘅普及率高達約93%,流動支付市場相對比較集中喺一線城市。時常出差到中國嘅朋友,一定知道流動支付(mobile payment)喺國內嘅普及同方便程度遠超香港,只要喺手機安裝流動支付嘅App,並接通微信支付或支付寶,再到裝有支付條碼驗證嘅商舖購物,用家不需人手或信用卡付款,就可以馬上完成整個交易。

Financial Times因應流動支付呢個熱潮拍咗部短片,以上海跟三藩市嘅流動支付做對比,喺唔同場合應用流動支付呢個模式,上海遙遙領先三藩市,有朋友仲笑話喺國內基本上唔需要帶錢出街。

好多都市人崇尚養生同健康,自然令我諗起世界好多地方連本土都有嘅共享單車,又自然諗起人人都講嘅共享經濟呢個概念,除咗健康因素興起共享單車熱,有朋友講話返內地旅行時見過林林總總嘅共享產物,包括共享充電寶、共享雨傘,甚至共享籃球,諗得出呢啲創作其實都幾好笑。

就以按時租賃式嘅共享單車為例,如果配套埋耗電極低嘅藍牙裝備,一個普通嘅電源可能都可以撐好幾年,透過太陽能發電甚至可以唔使擔心電源嘅問題,咁如果共享物品唔使考慮接電嘅問題,產品效率高兼成本效益好,更隨時隨地可以進行經濟共享。

科技嘅進步無疑令流動支付成本同驗證成本都降低,未來一定會有愈嚟愈多嘅共享產物出現市場,所謂共享即係話我哋買嘅只係借用權,有足夠利潤嘅引誘,就會好快有競爭對手投入搶佔市場,最後唔知會有幾多家共享單車擁有商可以留喺市場生存,亦唔知呢個熱潮可以撐到幾耐。因為當中所涉及嘅利益衝突,就好似本港首推嘅gobee.bike試過有單車被推落河而要報警備案,想要喺共享經濟呢個市場分餅仔,要認真考慮嘅客觀同人為因素,會相對較一般消費產品多。

雖然我無用過Airbnb同Uber,但可以想像到平台運作所需嘅技術應該唔複雜,安裝配套嘅App亦會以方便用户行先,我單純地理解Uber車主將自己閒置嘅車同時間去接載乘客從中獲利,乘客節省麻煩雙方繼而達成共享經濟。不過Uber暫時在港營運未合法,隨時會被放蛇兼被執法,喺上年佢哋仲全面退出中國兼被趕出台灣,情況應該跟香港類同,估計因為有關本土的士行業利益衝突引起。

我知道Airbnb嘅屋主將自家閒置嘅房間、甚至整間屋租俾旅客從中獲利,令住客節省金錢雙方繼而達成共享經濟,日常嘅生活模式基本上用手機就解決到,借用者喺購買借用產品過程中感覺便利,加上大家對手機日漸依賴,我哋對陌生人嘅警戒心,亦隨着呢個借用嘅消費模式普及化而降低咗,所以唔難理解近年Airbnb同Uber喺市場上咁受歡迎。

共享經濟在世界各地迅速流行, 但同樣會與相關行業的經營者有利益衝突,所以其發展在各地都惹起爭議。