為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2017 年 07 月 15 日

孖寶兄弟

潮流時裝八九不離十都是外國品牌,但近年卻有本地薑成功突圍而出,蜚聲國際。香港時裝品牌Ground-Zero創辦人兼設計師Eri Chu(朱鑫駿)與Philip Chu(朱柏弘)兩兄弟,在時裝界打滾十四年,近年成功打入巴黎及紐約時裝周,一四年更於內地真人騷節目《女神的新衣》為熊黛林設計服裝而奪冠,名氣暴升,就連鄭秀文、容祖兒、Twins等紅星都是他們的捧場客。

Philip雄心壯志說:「好多人都覺得喺香港做時裝好『濕滯』,就好似香港樂壇咁,但你唔可以排除總有人可以成為國際巨星。我哋當初做衫都無寄望可以行到咁遠,只係想透過設計表達自己嘅創作同態度,全部由零開始,因為我哋相信,Zero could be everything!」

呢啲咪叫兄弟同心,其利斷金囉!

 

 

失意之作

Eri和Philip兩兄弟外貌極為相似,但性格卻完全相反,比起哥哥寡言的個性,弟弟Philip較為能言善道,全程訪問幾乎由他發言。一向熱愛音樂的他們,一心打算做作曲家,卻在中途轉型做設計師。

「細個我好沉迷迷幻音樂,鍾意Radiohead、Portishead(另類搖滾及Trip hop)樂隊,一心諗住玩音樂,夾吓band,寫吓歌。中學畢業之後,就出嚟做嘢,做過model,又做過graphic design(平面設計),點知幾個月之後無啦啦俾(設計)公司炒咗,我好嬲,好失意,寫歌又唔夠人好,嗰時經濟又唔好,好難搵到一份好工,就諗不如開間多媒體創作公司,做自己鍾意嘅嘢,列咗一百樣想做嘅事,淨係做咗一樣,就係設計T-shirt!」

〇三年,他以玩票性質,與香港設計學院修讀時裝設計的哥哥Eri創立時裝品牌Ground-Zero,〇六年再到倫敦Middlesex University深造,為推廣品牌,他不惜硬着頭皮,逐間逐戶叩門兜售。

「當時我帶埋啲T-shirt去倫敦Soho區一帶逐間逐戶去問,『可唔可以睇吓我啲衫?可唔可以買我啲衫?』,啲人嘅反應係好愕然,點解會有個死o靚仔嚟sell嘢,好多人都(搵藉口)話要問番老闆之類,我就死咬住唔放,『咁你老闆幾時返呀?』、『你老闆個email係咩呀?』,呢個情況維持咗兩、三個月,終於有舖頭肯寄賣我啲衫。咁o岩嗰時Eri喺香港做咗幾年graphic designer,同咗D-mop合作,一、兩日就賣晒千三件(自家T-shirt),發覺原來(做時裝)都有出路喎,先開始將興趣變為事業。」

〇九年事業剛有起色,獲鄭秀文大力支持,令品牌開始明星化。

 

無錢落袋

初嘗成功滋味,兩兄弟由原先隨心所欲心態,變為認真對待的事業,但Eri坦言,前後足足捱了四年,才令品牌初見起色。

「我哋一開始真係乜嘢都唔識做,連件衫點整都唔識,只係當興趣玩吓,好多嘢都誤打誤撞,而且我哋無乜business mind(商業頭腦),搞到(盤生意)蝕蝕哋,頭嗰幾年根本搵唔到食,啲衫就算賣完都未必有錢落袋,只夠俾個business運行,但就唔夠俾人工,每個月得嗰四、五千蚊,好啲就一、兩萬蚊,仲要兩個人分,點夠使呀!嗰時我一路做衫,一路返正職,再要接freelance做。」

直到〇八年,兩人膽粗粗到巴黎做trade fair,想不到有幾十間店舖入貨,作品大受賞識,一二年更獲巴黎時裝公關公司邀請做巴黎時裝騷,成功在國外打響名堂。一四年再贏得內地節目《女神的新衣》比賽冠軍。想必現時身價已幾級跳,但兩人卻斬釘截鐵說:「無喎!」Philip笑着續說,「我哋到o依家仲捱緊。當時(參加節目)係一個好臨時嘅決定,係阿Kim(熊黛林經理人)無啦啦搵我哋參加,最後竟然贏咗冠軍,(奪獎後)發達就一定無,但知名度就真係高咗好多,喺條街上面都有人認得我哋。」

二人在內地節目《女神的新衣》為熊黛林設計服裝奪冠,Philip說:「係一個好好嘅挑戰,要喺幾百人面前講自己嘅時裝理念,又要喺一星期內做好件衫,係一個好大嘅磨練。」

 

人脈甚廣的他們,與Twins老友鬼鬼,她們更是其品牌擁躉之一。