林鄭百日維新 再現﹁好打得﹂本色
首位女特首林鄭月娥正式履新後，馬不停蹄落區家訪，呢幾個地方原來同佢有點淵源。首先係打鼓嶺竹園村，佢做發展局局長時因應香園圍新口岸工程，處理呢條村遷村工作，幾經周旋終於搵到居民滿意的搬遷及賠償方案。
佢上台後馬上去了解居民新生活，有居民話佢做局長時已承諾會再嚟探訪，「佢無食言，今次仲係用特首身份嚟。」另一個落區地方係上環永利街嘅「光房」，喺佢一五年做政務司司長探訪過，今次重遊掌握咗居民最新情況。政界人士認為，林鄭想溫故知新，先更新過往處理過嘅事件，再接手新議題。
據悉，林鄭有意將施政報告出爐日子重新定為每年十月，到時立法會啱啱復會無耐，可以馬上落實新嘅政策，「那時佢正好上任約百日，當中有六大施政重點，包括通過五十億元教育撥款、公布高鐵一地兩檢方案、取消強積金對沖、中策組加入青年人代表、研究係咪畀未補地價嘅居屋作出租用途，以及增設金融業委員會。」
消息指，「百日維新」部分議題好具爭議性，林鄭期望各方互讓互諒化解分歧，佢會加強落區，了解民情；亦計劃每個月最少一次到立法會解畫，希望施政暢順，社會更和諧。
林鄭月娥上任後隨即落區視察民情，其中打鼓嶺竹園村係佢掌管發展局時，為興建新口岸要搬村，今次重遊，居民已安居樂業。
