溫碧霞跌膊靚晒機場

溫碧霞（Irene）雖然年屆五十歲，但佢有美魔女之稱，無論身材同埋樣貌都保養得宜，依然索爆！東姑仲記得當年佢拍無綫劇集《火玫瑰》，飾演嘅角色叫「海潮」，故仔講乜大家可能唔多記得，但就一定記得佢嘅造型，件衫「跌膊」係指定動作，仲幾乎場場戲都露膊示人。

早排東姑又喺機場見到Irene，啱啱落機推住一車行李嘅佢，懷疑飛機冷氣大，所以加咗件鬆身外套，但係內膽依然係一件吊帶背心裙，唔知佢有意定冇意，出閘嗰時，東姑見佢將件外套着到跌晒膊，點都要晒下個靚膊頭畀人睇，幾廿年來如一日，繼續「海潮」上身。

另外，有啲嘢東姑都幾服佢，雖然佢嫁咗畀銀行家老公何祖光多年，已為人妻闊太。不過，咁多年來都仲keep到少女味，好似落機嗰時，佢既戴住副黑超，又掛住個大耳筒，潮味十足，話佢係十八廿二都仲呃到吓人，認真犀利！

無綫喺九二年播出嘅《火玫瑰》，Irene幾乎場場戲都露膊示人，而呢個造型自此亦成為佢嘅標誌。

 

Irene一落機出閘嗰陣，件外套已經進入指定mode，着到跌晒膊咁，keep住係「海潮」嘅造型。

佢推住一車行李由外地返嚟，兩個大旅行袋都係名牌子LV。

唔知係有心定冇意，Irene專登着件鬆身外套，跌膊都容易啲。

Irene都幾無懼性感，露膊之餘，有時仲晒腰，網派福利。

Irene二千年下嫁國民黨將軍何應欽後人、銀行家何祖光，婚後收養兒子Xavier。