為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 07 月 08 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

吸睛是非精

雖然「是非精」一詞好負面,但係多得TVB嘅受歡迎節目《學是學非》,令呢個標籤得以重生,仲意外地成為網友焦點。今次「Paco巨星飯堂」,就邀請咗其中四位「是非精」:麥美恩(Mayanne)、馮盈盈(Crystal)、劉穎鏇(Tiffany)同張寶兒(Bowie),攞正牌Happy講「是非」。

我帶四位嘉賓去到位於尖沙咀嘅「奏海鮮火鍋」,食住火鍋「學是學非」,梗係更加和味!

「是非精」Bowie、Mayanne、Crystal同Tiffany(左至右),投入地主持《學是學非》,喺節目中各自發揮所長,成功引起網友注意。

 

大師姐風範

節目受歡迎,由一三年開始播出,一六年仲成為《2016年萬千星輝頒獎典禮》嘅「最佳綜藝節目」,o依家已經播到第五輯,而今輯仲加入咗幾位應屆港姐擔任「是非精」,而同樣為港姐出身、由第一輯已經出任主持嘅Mayanne,就理所當然地成為大師姐。

「佢哋都好努力去累積經驗,Crystal轉數好快,好多時有咩突發事件,佢都執生執得好好;Bowie喺主持工作上好有才華,口才好;Tiffany就啱啱細我十年,佢二十歲、我三十歲,會令我好想保護佢,同埋幫佢。」

三位生力軍對大師姐自然係有讚冇彈,佢哋異口同聲表示:「因為我哋真係好新,所以由記稿、俾反應、企位同走位,大師姐都會教我哋,我哋都係邊做邊學。」

對於三位新「是非精」嚟講,每一樣嘢都係新嘅體驗,一六年港姐冠軍Crystal話:「最近我哋去咗古裝街拍其中一個實驗,仲要着晒古裝喺度吹泡泡,成個組合都好有趣,我哋都拍得好開心。」

我帶四位「是非精」,去到位於尖沙咀嘅「奏海鮮火鍋」,講住「是非」品嘗特色火鍋。

 

除咗生活小知識,仲有網友焦點,即係一眾「是非精」外,節目亦有嘉賓如袁文傑客串,增加新鮮感。

 

魚翅花膠雞鍋($338),以即日熬煮四小時嘅老雞湯作湯底,再加入本地鮮雞、花膠及魚翅,夠晒滋補。

 

辣汁花甲蟹雜菌湯鍋($398),集海鮮嘅鮮味同辣汁嘅惹味於一鍋。

 

冰鎮瀨尿蝦($148/隻、左)選用來自東南亞嘅巨型瀨尿蝦製作,清涼鮮甜;磯煮冰鎮鮑魚($98/隻、右),以秘製醬汁及鮮蘿蔔炮製嘅南非鮑魚,連蘿蔔都極為入味。

 

火鍋營養學

而Tiffany同Bowie,就同大師姐去咗日本拍外景,「友誼小姐」Bowie表示:「主持呢個節目,除咗可以鍛煉自己嘅記性同口才,仲可以訓練埋演技,因為每一集我哋都有唔同嘅角色扮演,每一次都要投入去演,呢啲都會成為我哋日後嘅經驗。」

港姐亞軍Tiffany話:「仲係一個好好嘅機會,俾我practice多啲中文。」

大學修讀食物及營養學嘅Crystal,仲表示可以活學活用透過節目學到嘅小知識。「節目講過打邊爐嘅時候,點樣可以好容易咁撇走上面啲油,就係先用冰冷凍咗個湯殼,再放到個湯鍋度,就會吸咗湯面嘅油,就好容易(手畢)走嘞。」

講到有營地食火鍋,Crystal就講咗啲簡單小貼士。「打邊爐要食咗菜先,因為最後先食菜嘅話,啲菜就會吸晒之前淥嘅肥牛,或者其他肉類嘅油,咁樣就又肥又唔健康啦!」

大師姐Mayanne(左)大讚師妹Crystal轉數快,係可造之才。

 

喺日本拍攝外景期間,Tiffany(後左二)、Bowie(後右二)同Mayanne(前左)仲同老牌動作影星倉田保昭(後中)合作。

 

為節目同另一位「是非精」湯洛雯(左)着上古裝,Tiffany(中)同Crystal(右)都覺得相當好玩。

 

日本黑豚肉($98),爽而不膩。

 

本地手切牛(細$228/大$298),牛味香濃細緻。

 

餐廳嘅餃子及丸類都係自家製,日日新鮮製作,圖為菜苗蛋白餃($68)。

 

多元化發展

除咗主持呢個合家歡節目,三位應屆港姐都有其他工作在身,不愁冇機會累積經驗。Tiffany話:「我哋都有拍《溏心風暴3》,係一個好好嘅experience。」

Bowie除咗做一啲大型節目嘅司儀,仲同兩位小生去非洲。「之前我同袁偉豪、楊明去咗坦桑尼亞拍《打工捱世界II》,不過我喺節目入面係遊客加義工,所以唔使同佢哋一齊捱,只係喺旁邊睇住佢哋。」

工作一個接一個,三位娛圈新鮮人樂此不疲,要keep住最佳狀態,Tiffany就話:「做運動嘅效果係最好嘅,雖然o依家好忙,但有時間嘅話,我都會做運動,雖然少咗打籃球,但係我會跑步。」

由參選港姐到主持節目,Tiffany(左)同Bowie拍住上,培養出真感情。

 

Bowie同袁偉豪(右)及楊明(左)喺非洲拍攝嘅《打工捱世界II》,啱啱開始播出,佢愈嚟愈多機會同觀眾見面。

 

Crystal即將要投入劇集《果欄中的江湖大嫂》嘅拍攝,同時又與麥明詩(左)及陸浩明(中),主持J2新節目《後生仔傾吓計》,工作接踵而來。

 

小食冰火魷魚($48)屬於冷盤,以秘製香辣汁炮製,一口感受冰與火嘅極端,刺激味蕾。

 

百花釀竹笙($138),爽口嘅竹笙內裏釀入彈牙嘅自家製蝦膠,層次豐富。

 

奏海鮮火鍋
地址:尖沙咀寶勒巷3-7A號萬事昌廣場1樓101號舖
電話:23192988