為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 親子天地  > 爸爸公子 2010 年 05 月 18 日

梁繼璋

電台著名節目主持人、專欄作家、口才班導師及浸會大學教育碩士,十多年來均高踞電台最受歡迎主持人榜首,亦先後擔任過電台創作總監、副節目總監等職務,近年積極開辦不同形式之成人及兒童口才班及演藝班,同時亦不忘自我增值,除了持有香港公開大學之兒童心理學證書外,還完成了香港大學專業進修學院之基本催眠治療課程。

阿仔,我憎你

阿仔,我憎你。

雖然,你係我嘅後代,我嘅接班人,我嘅未來米飯班主。不過,我都仲係好鬼憎你,原因有以下呢啲:

① 由你出世開始,你媽媽即係我老婆,就即刻好似睇唔到我咁,無論我行去邊,做緊乜嘢,佢對眼都只係望住你,過馬路過陣,佢都只會拖住你;瞓喺牀上嗰陣,佢都只係攬住你,佢唯一會留意我,同埋同我講嘢,就係當我抱住你嘅時候。但係,佢講嚟講去嘅都一定係:「你抱好啲啦,阿仔就跌啦。」、「你拉番低佢件衫啦,阿仔凍呀。」

由你一出世,我就即刻喺呢個地球消失咗。你話,我憎唔憎你?

② 仲有,唔知乜嘢原因,我買鬼死咁大件嘅T恤都只係百幾蚊,你嗰啲細件過狗仔衫嘅幾幅布,就閒閒哋都三四百蚊,本來都唔緊要,之但係你又大得快到死,明明上一季買嘅長褲,依家已經變成三個骨褲。結果,我老婆即係你阿媽,又去嗰間殺人王童裝店,由我辛辛苦苦賺嘅錢,去買嗰啲貴到嚇死人嘅縮水衫。

你話,我憎唔憎你?

③ 仲有,我份人老成持重,知書識禮,係上等人一個。但係,為咗博你一笑,我成日陪你去啲主題公園。幾十歲,扮有趣,追住米奇去排隊。人哋姐姐派貼紙,你一定又會手指指,我就扮無恥,攞完Micky又攞Winnie,搶完Donald又搶Gooby。

我嘅高貴形象,就係咁付諸流水。

你話,我憎唔憎你?

④ 仲有,你阿媽話BB嘅生活應該有規有矩,定時定候。所以,你嘅起居飲食包括人生大事都係有個時間表嘅。本來,我都唔介意你咁樣,之但係你嘅臭臭時間,點解一定要同我嘅晚飯時間一樣呢?

無論我食燒雞定燒鴨,龍蝦定乳鴿,我個鼻都只係聞到一種味:「臭」。

你話,我憎唔憎你?

⑤ 仲有,我有個花名叫做「不求人」。

我依家份工,係我老細叫我做嘢。

我依家個老婆,係佢自己叫我娶嘅。

不過,由你夠年紀考小學開始,我就為咗畀你考入名校,左思右量,左搵右搵,見人就託,見form就攞,見隊就排,見試就面。

為咗你嘅前途,我瘋瘋癲癲。

為咗你嘅前途,我晚晚失眠。

⑥ 最後,你令我患上強迫症。

無論做到幾「攰」,都要打電話返屋企聽吓你把聲;無論做到幾夜,都要錫一啖牀上熟睡嘅你,先至安樂。 你令我愛上你呢個男性,而且仲係死心塌地嗰種。

我憎你,但係我更加愛你。

我愛你,所以又點捨得憎你。