為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 06 月 29 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

來日方長 放眼未來

候任行政長官林鄭月娥已經帶領佢嘅團隊喺六月二十一日會見傳媒,現任三名司長原班過渡,十三名問責局長中有八位嚟自現屆政府,四人由現職公務員轉任。林鄭講過佢嘅新團隊會用心聆聽市民心聲,政府內部亦唔會各自為政,跟着又講到23條立法係特區政府憲制責任,對保障本港市民安全有幫助。呢啲都係正常官腔我就不作評論。

想講嘅係坊間有評論話新一屆三司十三局欠缺新面孔,我就覺得佢哋雖然未必係全部市民認同嘅人選,但如林鄭所言無驚喜就即是無驚嚇,起碼部分市民對呢個團隊唔會感覺陌生。有理由相信當中有好多同林鄭已經合作多年,先唔好理新一屆班子係唔係由中央拍板,新團隊又係唔係林鄭嘅心腹,又會唔會對林鄭構成威脅等等其實都唔重要,反而我哋無理由唔俾個機會新政府,同新班子去證明佢哋嘅工作能力。講多無謂行動最實際,政府部門喺施政上如果操作順利,以普羅市民嘅福祉為依歸嘅,兼對大家日常生活有幫助嘅先最重要,咁對政府同市民雙方先夠公平。

林鄭喺六月二十二日亦公布咗嚟近將喺七月一日生效嘅行政會議非官守成員名單,一如所料曾任林鄭競選辦主任嘅陳智思將出任行會召集人,金管局前總裁任志剛亦將出任行會成員,其他新面孔包括有民建聯張國鈞、工聯會黃國健、鄉議局劉業強、安老事務委員會林正財、民主思路湯家驊亦加入新一屆行會;多名現任行會成員將續任,包括早前參選特首辭任嘅葉劉亦將重返行會。基本法規定行政長官做任何重要決策前需要徵詢行會意見,行會亦係實行保密制及集體負責制,即是話行政會議成員係行政長官好重要嘅政策顧問,所有行會成員有責任確保政策未成立之前,務必聆聽各階層市民、勞資雙方嘅訴求,吸取同結集過人及過去經驗,協助建立有包容性嘅政府去面向將來。好似我之前所講,同樣無理由唔俾新行會一個證明佢哋作用嘅機會囉。

以好單純嘅角度去睇林鄭新一屆政府團隊,就自然知道佢盡可能會請合作過又合作到嘅隊友,大家坐埋同一條船,如果唔齊心就容易出事,要請新一屆行會成員名單道理都應該同上,都應該傾向搵相對地比較傾到偈嘅成員,否則可能永遠只係得個講字而唔會有實際行動。其實上市公司要搵董事會成員,在情在理亦都傾向搵合作到嘅專業人士,溝通到先可以合理地通過方案,對股東有交代嘅同時,亦唔會成事不足敗事有餘。引伸到去政府又或私人機構,凡此種種道理咪又都差唔多一樣。

新一屆政府班子被批評為無新面孔,但新班子已經與林鄭合作多年,有理由相信會較易溝通,令政府施政更為暢順。