為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 06 月 17 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

驚喜放試

o依家嘅觀眾,要求愈嚟愈高,好在選擇亦都愈來愈廣,足以滿足一對對雪亮眼睛。好似「奇妙電視」節目《放試》,就以現實mode,經主持人演繹各種測試,展現出社會百態,是他也是你和我喺生活上遇到嘅情況,所以甚有驚喜。

今次「Paco巨星飯堂」,我就邀請節目五位主持人:趙海珠、林小珍、簡采恩(Joyee)、李尚正同鄺家銘(阿占),去到位於大坑嘅「Warren」,品嘗特色嘅法國菜,暢談佢哋通過測試所觀察到嘅種種現象。

Joyee、珠珠、小珍(前排左至右)、阿占同阿正(後排左至右)喺《放試》中,通過連場測試,甚至連自己人都測試埋,去探討社會現象,展現創意同心思。

 

跳出框框

今次節目集合資深嘅主持人,仲有兩位美女前主播,都可謂甚有賣點。令人驚喜係,小珍同珠珠跳出昔日比較嚴肅嘅框框,投入測試。

珠珠話:「我會主持呢個節目,係畀幕後工作人員呃嘅!哈哈!佢哋叫我做主持人,都冇講過要我去測試人哋,我都應承咗做主持,仲介紹埋小珍一齊做,好彩個節目咁好玩,咁我都冇介紹錯。

「我負責嘅測試,係關於香港人嘅耐性,我戴咗眼鏡,喺一間牛腩麵店入面做侍應,過程中真係冇人認得我。喺測試入面,我要經常犯錯,好似落錯單、係咁問客人點咩菜、上菜又上得好慢,睇吓啲客人會唔會冇晒耐性發脾氣。我最難忘係,真係有客人對住我爆粗,咁呢個畫面就梗係唔出得街啦!」

當珠珠只係負責測試港人,小珍就要做被測試嗰位。「佢哋想測試我係唔係假正經,於是就請咗一個猛男,再將我同猛男單獨共處一室,跟住個猛男同我講,佢之後要拍教人keep fit嘅節目,仲叫我幫佢搽油。我見化妝間得我同佢,咁梗係同佢搽,有少少親密接觸啦!

「後來Joyee先至話,原來佢哋同埋啲crew,喺隔籬間房睇晒成個過程,仲忍笑忍得好辛苦囉。」

我帶五位嘉賓去到位於大坑嘅「Warren」,品嘗特色嘅法國菜之餘,亦大談佢哋通過測試所觀察到嘅現象。

 

小珍就被拍檔們反測試,以健碩model考驗佢嘅定力。

 

珠珠戴上眼鏡,喺牛腩麵店測試港人耐性,卒之被爆粗問候。左為阿正。

 

經典龍蝦沙律($178),啖啖都充滿龍蝦嘅鮮味。

 

秘製磯煮鮑魚($128),經秘製醬汁煮理嘅鮑魚,鮮香味美。

 

蟹肉沙律($138),蟹肉嘅鮮香混合清爽嘅沙律,啱晒炎炎夏日。

 

鵬哥試咪

Joyee除咗要幫手測試小珍,仲同鵬哥盧海鵬去咗街頭,同年輕人jam歌,展示盧海鵬試咪嘅威力。「以前我只係喺電視睇過鵬哥唱歌,嗰次第一次喺現場睇,真係好正,佢仲要唱〈幾許瘋語〉,勁過好多後生仔。」

阿占同阿正都有同鵬哥交流,阿占話:「我哋就用VR同鵬哥一齊睇愛情動作片,成個過程都有check住我哋三個嘅心跳,喺我同阿正都有心跳加速嘅時候,鵬哥直情係處變不驚,仲話:『哼!我有咩未見過吖!』,堅有霸氣!」

阿正就仲有另外一啲測試,「o依家韓國風咁勁,我就整咗個韓國idol look,化晒妝畫晒眼線出街,啲路人見到我嗰個款,真係以為我係韓星,仲係咁集我郵同攞簽名,都冇問過我係邊個。」

阿正、Joyee同阿占(左至右)轉數夠晒快,呢個咁講創意同執生技巧嘅節目,就啱晒佢哋發揮。

 

阿正(中)以一身韓國idol造型,於街頭測試路人反應,結果唔少路人都以為佢係堅韓星!右為Joyee。

 

鵬哥盧海鵬都有參與節目演出,Joyee仲話前輩同後生仔有得揮。

 

香煎鴨胸配紅酒汁($238),外皮煎得香脆,又保留到肉質鮮嫩。

 

低溫油封三文魚柳配白酒忌廉汁($238),經低溫油封處理嘅三文魚,令人有入口即溶嘅感覺。

 

香煎法國羊柳配意大利青醬酥($248),外脆內juicy。

 

兩職媽媽

節目對一眾主持嚟講,好玩得嚟亦相當具挑戰性,而小珍同珠珠要兼顧家庭同事業,仲要照顧小朋友,挑戰性直情要加倍。珠珠話:「我個仔o依家四歲,個女就一歲幾,都係需要我去照顧嘅時候,所以我都係兼職工作,將時間盡量晒畀佢哋。除咗接返學放學,我都會幫個仔整吓便當,日式個隻,整下啲卡通人物飯團,佢食得開心,我又整得開心。

「至於個女,我都會帶佢去吓playgroup,不過可能平時哥哥成日搶佢啲玩具玩,搞到佢喺playgroup又搶其他小朋友嘅玩具,真係要慢慢教佢,女仔唔可以咁粗魯o架!」

小珍嘅囡囡就只得十八個月大,「所以我都係將時間貢獻晒畀佢,佢好鍾意食麵包,於是我就買咗個麵包機,得閒就整啲麵包畀佢食。因為佢仲未食得嗰啲太濃味嘅食物,所以自己整我會放心好多。」

要兼顧家庭及事業,但珠珠同小珍都能夠取得平衡,令人不得不佩服。

 

育有一子一女嘅珠珠,子女現分別四歲與一歲,對於湊仔女生活,佢樂在其中。

 

小珍嘅囡囡現十八個月大,媽媽一臉滿足表示,享受為女兒炮製愛心麵包。

 

法式焦糖芝士蛋糕($78),甜而不膩。

 

慢煮西班牙豬肩配蘋果蓉($258),肉質嫩滑又帶淡淡橡果香,不可不試。

 

Warren
地址:大坑華倫街9號地下1號舖
電話:2392 5121