為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2017 年 06 月 15 日

蔡一智為咗林敏驄傷pat pat

向來搞鬼嘅林敏驄,上周五(九日)喺紅館搞嘅《今天星光閃閃時日如飛林敏驄35年腦交戰作品展演唱會》發生咗意外,當日下晝五點幾,草蜢正喺度綵排時, 因為機件故障,成個舞台突然塌咗落去,圓形升降台側咗一邊。草蜢三子同埋六個舞蹈員全部跌晒落台,雖然蔡一傑、蘇志威冇乜大礙,但係蔡一智就戥親咗個「八月十五」,傷咗尾龍骨。第二日,佢就去佐敦睇咗兩個鐘醫生;期間,表情痛苦,而且需要由老婆扶住先慢慢行到。

事故發生之後,現場一片混亂,工作人員都嚇呆咗,六個舞蹈員傷勢都唔輕o架。跟住,救護車嚟到將傷者送晒入院;不幸中嘅大幸,就係全部都清醒。之後,全體工作人員拜神嗰陣,大家神色凝重,林敏驄更加面無表情;而草蜢三子,就只有蔡一傑一個人出嚟上香。

雖然演唱會如期舉行,但係就因為呢件事搞到個騷要遲咗成個鐘先開始,成班觀眾喺場外,非常鼓譟。東姑見到等入場嘅人龍去到對面馬路咁滯,出面又熱又焗又多人,大批觀眾喺場外無奈苦等,大會就不斷發出廣播,呼籲觀眾去陰涼處等候。唉!四圍都冇冷氣,去到有冷氣嘅火車站等,又驚錯過咗入場,直至到八點五十分,大會安排入場,九點半終於有得睇嘞。

意外發生之後,先舉行拜神儀式,而拜神嗰陣,平日愛搞鬼嘅林敏驄都面無表情,其他人亦都神色凝重。

 

身為演唱會老闆之一嘅林建名,仲不時緊皺眉頭, 似乎驚魂未定。

 

因為塌台事件,草蜢成員之一嘅蔡一智搞到patpat受傷,要立即返咗屋企休息;而其中有兩個女舞蹈員則要送院,主要係下巴同腳部受傷。

 

因為意外問題,演唱會延遲咗一個鐘先開始, 紅館門外人頭湧湧,又熱又迫,令到觀眾好鼓譟。