為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2017 年 06 月 03 日

于淼迷死50歲甘草

《不懂撒嬌的女人》肯定係TVB近期嘅話題作,而令東姑最嘆為觀止嘅係凌大威(劉丹飾演)嗰段情。雖然六十五歲嘅大威叔個腎有事,但係年輕貌美嘅售貨員小白(于淼飾演),竟然不自覺咁愛上佢,最後仲搞到奉子成婚添,真係睇故唔好駁故!

劇中,頭髮長長、白白淨淨、眼睛大大嘅于淼,笑起嚟好甜美,相信應該迷倒唔少宅男。原來,佢畢業於大連民族學院國際商學院,喺一二年,代表大連參加「國際中華小姐選舉」,即使最終落選,但係就入咗無綫。

自稱單身嘅于淼喺現實生活中,一樣係畀大叔追到有氣冇碇唞,而呢位大叔就係近年頻頻同佢合作嘅五十歲江榮暉。八七年入無綫嘅江榮暉,拍過超過五十套電視劇,全部都係綠葉角色,一直都冇乜發圍嘅機會。最近,東姑收到風,指佢非常迷戀廿七歲嘅于淼,就連Facebook嘅牆紙都係用兩個人嘅合照。另外,佢上載嘅日常生活相片,有七成都係同女神嘅靚相,盲嘅都睇得到佢有幾鍾意于淼啦!

于淼曾經同東姑講過,屋企人全部喺北京,一個女仔芳心寂寞,唔通江榮暉今次有機?佢仲講到擇偶條件,一定要善良,又唔會理對方嘅身高同外貌喎。咁父女戀又接唔接受呢?佢係暉暉唔係城城噃。

喺江榮暉嘅社交網相簿入面,全部都係同于淼嘅合照, 唔講真係以為佢哋係一對熱戀中嘅情侶。

 

于淼面圓圓、眼睛大大,感覺既可愛又善良,戲裏、戲外都畀大叔力追。

 

齋睇呢張相就知道江榮暉,已經畀于淼嘅笑容迷倒。

 

江榮暉每次同于淼開工,除咗會捉住佢不停傾偈之外, 仲會成日影頭貼頭嘅合照。

 

五十歲嘅江榮暉,迷戀于淼迷到要用佢哋兩個人嘅合照,做Facebook嘅牆紙添。

 

一五年無綫「台慶送大禮」大獎,原本機會係麥玲玲嘅,最後由于淼頂上,佢仲贏咗一百萬獎金同獎品。