謝霆鋒和張栢芝的細仔謝振南（Quintus），日前剛度過七歲生日。雖然謝霆鋒為工作不時四圍飛，但阿仔生日大過天，無論有多忙，他都mark定時間返港陪兒子慶生。

近年煮得出色的謝霆鋒，去年獲「米芝蓮之友」殊榮，上周四（十一日），他當然親自落廚炮製大餐，幫Quintus慶祝七歲生日，以彌補平日少見的光陰，增加父子情。同場還有大仔謝振軒（Lucas）、爺爺謝賢和嫲嫲狄波拉（拉姑）等，一家人整整齊齊留家舉行生日聚會，兩個小寶貝當然全日都興高采烈。

細仔Quintus七歲生日，謝霆鋒外出打點好一切，下午便回家作最後準備；下車時，他仍用手機上網研究當晚生日宴的餐單。

下午四點，爺爺謝賢也現身霆鋒的寓所，笑住表示是跟Quintus在兒子的家中開生日會。

鬼馬匿埋

謝霆鋒和張栢芝雖然已經離婚六年，但二人對兩個寶貝仔Lucas和Quintus均十分疼愛。近月忙於搞英語版《鋒味》的謝霆鋒，剛去完峇里大獻廚技，便馬上回港籌備細仔Quintus的七歲生日宴。

據悉，身為廿四孝老竇的謝霆鋒，早已諗好菜單。在上周四（十一日）生日宴當日，他一早便外出作最後打點，至下午兩點才在助手的陪同下，返回寓所開始準備下廚。心情大好的他，一見記者也大方打招呼。其後，兩個寶貝仔、爺爺謝賢及嫲嫲狄波拉也陸續抵達。趁謝賢未上樓之際，記者迅速上前訪問，他表現雀躍說︰「我都唔知送乜？都係封一封利是畀佢。」

當晚，謝霆鋒一手包辦整餐生日宴，兩個仔都食得好開心，至九時許才完結。難得跟爸爸歡聚大半日，Lucas和Quintus離開時興高采烈，當他們的座駕駛出大廈時，發現記者拍照，兩個人仔即躲在司機位後避鏡頭，十分鬼馬。 

上周六（十三日），張栢芝為Quintus舉行生日會，並邀請過百位小朋友參加，其生日蛋糕更是漢堡包造型。

捱了成臉忌廉的Quintus，雖然十分狼狽，但玩得開心，阿媽張栢芝即替他清潔。