為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 05 月 18 日

邱騰華傳過檔環團 林鄭新班子大執位

新政府組班工作如火如荼,據了解三司十三局中,最少九名局長已初步敲定,多位副局長包括食衞局嘅陳肇始、教育局嘅楊潤雄及保安局嘅李家超,盛傳會「升正」做局長。不過都有令人意想不到嘅大執位戰況,早前有傳會升做政務司司長嘅現任特首辦主任邱騰華,可能退出熱廚房。據佢身邊人透露,邱騰華有意離開政府,傳聞指有份筍工正向佢招手,咩工咁筍?就係一個頗具規模嘅國際環保團體。

現屆政府官員之中,五十七歲嘅邱騰華算做資深,做過保安科、政務總署、衞生福利科、工業貿易署等,○七年升為環境局局長。據悉,佢同候任特首林鄭月娥關係良好,曾獲邀請出任下任商務及經濟發展局局長,接近佢嘅消息人士說:「佢(邱騰華)話,過去五年都做幕後崗位,個廚房真係好熱,如果出面有機會,趁仲後生不妨一試。」外傳佢做環境局局長時與環團結緣,有國際環團趁政府「音樂椅」轉緊嘅時候希望冷手執個熱煎堆,接觸佢過檔。盛傳雙方仍在摸底洽談,林鄭亦挽留緊。

根據政治任命官員嘅「過冷河」規定,如果他們離任後一年內接受政府以外嘅機構聘任,係需要事先徵詢特首及「政治委任官員離職後工作諮詢委員會」嘅意見,按個別情況處理。有政界中人指出,如果係過檔去環團或社福界,一般較易獲批准。

有傳邱騰華本來獲邀請接替蘇錦樑做商務及經濟發展局局長,佢唔做咁邊個做?據悉林鄭仍未拍板,但政界盛傳該局現任副局長梁敬國,有機會坐正。

同時,政界流傳證監會執行董事梁鳳儀係財經事務及庫務局局長熱門人選。但梁鳳儀o依家攞緊六百幾萬年薪,要佢減到四百萬做司長有難度,現任副局長劉怡翔亦係呢個位嘅大熱。

邱騰華(前左)與林鄭月娥(中)關係良好,曾獲邀入新內閣,但邱騰華似乎另有諗法,據悉林鄭正積極挽留。

 

楊潤雄熟悉教育政策,係教育局局長嘅大熱人選。

 

李家超(右)如無意外應會出掌保安局,而劉怡翔(左)則有機問鼎財經事務及庫務局局長。

 

 

變數較細的局長人選 


李家超 (保安局)
楊潤雄 (教育局)
黃錦星 (環境局)
陳肇始 (食物及衞生局)
羅致光 (勞工及福利局)
聶德權 (政制及內地事務局)
張雲正 (公務員事務局)
劉江華 (民政事務局)
劉怡翔 (財經事務及庫務局)

仍未有定案的職位包括:政務司、律政司、財政司、發展局、商務及經濟發展局、運輸及房屋局、創新科技局