向氏兄弟爆搵鄧兆尊拍戲內情

鄧兆尊近年淡出娛樂圈，相隔八年之後，早前再接演一部網絡電影《失業皇帝2017》，好多人認為已故祥哥（新馬師曾）遺產剩落大把，佢一定唔憂做；不過，早排祥嫂（洪金梅）又話，兆尊高調晒三個女友，係想博曝光博復出喎！咁究竟兆尊係唔憂做，定搲撈呢？

東姑直接問咗投資《失》片嘅老闆向展邦、向展威兩兄弟，佢哋就爆料話，係自己主動接洽兆尊演出嘅，少少因為睇到兆尊呢排嘅新聞，想搵個有份量同有啲名氣嘅演員，好自然諗起佢，加上安排佢演住籠屋靠賣舊電器維生嘅呢個「財哥」角色，兆尊無論外形同感覺都夠「貼地」，覺得佢亦相當適合角色喎！向氏兄弟仲話，今次搵兆尊一共拍咗四場戲，酬勞有六位數字。而兆尊都好易話為，冇喺價錢上計較過，可以話大家係一拍即合。

早排，東姑去過現場探班，兆尊扮演籠屋居民，因為被大集團逼遷，而着晒「血衫」抗爭，睇佢着到周身爛身爛勢，演得都好投入。佢同東姑講今次拍戲，最想睇吓o依家同以前有乜唔同，兆尊話：「o依家啲拍攝手法唔同晒，兩部機一齊拍，唔使由朝等到晚。同埋後生一代嘅演員，我都唔熟，可以乘機了解吓佢哋，有乜新思維同埋新諗法。」

《失業皇帝2017》嘅老闆向展邦當日都嚟埋現場探班，仲爆搵兆尊拍戲，大家冇喺價錢上斟酌過，而佢又話睇好梁烈唯，所以搵佢做部戲嘅男主角。

兆尊身材瘦瘦削削，就算唔使化妝，外形都好「貼地」，由佢扮演窮人籠屋居民，都好有說服力。

兆尊入戲鬧梁烈唯鬧到手指指，投入到唯唯都嚇一嚇，忍唔住出手擋。

拍攝空檔，東姑發現兆尊忙住接電話同覆短訊，唔知係咪畀三個女朋友「追魂call」呢？