為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 05 月 04 日

特首競選經費 豪手揼錢 裝身練口才

選舉事務處公布咗特首選舉各候選人選舉開支,呢場選舉林鄭月娥同曾俊華嘅開支都超過一千萬元,而葉劉淑儀同胡國興就分別花費近五百九十萬及三百二十萬元。扣除選舉捐贈,林鄭同鬍鬚曾都有超過五百萬盈餘,但葉劉同胡官就分別倒貼三十四萬同一百八十萬元,認真肉赤。

林鄭用剩嘅經費,會捐畀七間慈善機構,包括協青社、寶血兒童村、陳校長免費補習天地等六間機構各捐一百萬,餘下嘅現金同競選辦傢俬就贈畀救世軍。至於鬍鬚曾,用剩五百一十六萬會捐畀香港防癌會、喇沙基金、聾人福利促進會等十間慈善機構。

細睇佢哋嘅開支,胡官裝身開支僅六十蚊,超級慳家,相反出名顧形象嘅葉劉就用咗七萬八千,當中一萬八千蚊用嚟請一個叫Yvonne嘅化妝師扮靚,每次盛惠三千蚊。據facebook專頁顯示,呢位化妝師一一年入行,幫過唔少藝人同記者化妝,亦有接婚禮化妝生意,喺銅鑼灣有個小小化妝間。

幫林鄭化妝嘅Gary Chung出名得多,佢喺銅鑼灣都有間化妝學校,而且係「千億新抱」徐子淇同賭王千金何超蓮嘅御用化妝師。以為佢收得乸利,點知林鄭首場造勢大會,佢只係收二千蚊化妝費。

林鄭同時花咗二百萬請競選團隊,當中身為佢港大同窗嘅「世聯顧問」總裁麥黃小珍,幫佢做咗兩個月競選公關,就袋咗三十二萬人工。有指麥黃小珍原本開價月薪十八萬,後來參照新聞處總新聞主任月薪最多只係十二萬,麥太於是收順啲。

做「政治化妝」出晒名嘅鬍鬚曾,亦有喺三月中嘅選舉論壇花三千蚊請人化妝,形象包裝花費唔算多。不過他另外使咗近五萬二千蚊去學「語言化妝」,增強辯論及應對傳媒技巧,當中有三萬蚊用嚟拜一直有兼職教辯論嘅傳媒人黃潔慧做師傅。此外,鬍鬚曾使得比較闊綽嘅地方仲有三個跟佢落區嘅標語模型、一萬個襟章同扭蛋機,設計連製作使咗五十四萬元。

特首選舉曲終人散,但林鄭(中)、曾俊華(左)及胡官(右)嘅競選經費點樣使,再次成為討論嘅焦點。

 

曾俊華競選活動出動過扭蛋機,原來設計連製作要逾二十萬蚊,認真價值不菲。

 

葉劉着重形象,用咗一萬八千蚊嚟請名叫Yvonne(圓圖)嘅化妝師。