為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2017 年 05 月 02 日

耆英打網球 有姿勢有實際

網球這玩意源於法國,在英國誕生,再在美國發揚光大,成為風靡全球的體育運動,深受不少年輕人歡迎,而在香港這地方,有一班長者在晚年才投入這門運動,每星期在球場揮拍兼揮灑汗水,似模似樣。

星期二早上七點正,上水北區運動場旁的網球場上,有十三人正在上網球班。細看方發現,他們全是銀髮一族,其中一名學員麥留娣(阿娣)一下抽手,再一揮拍,球便過網打到對面場,姿勢似模似樣。「學咗個幾兩個月,好好玩,但姿勢唔係咁好。」她說。

六十四歲的阿娣五年前中風,自此便明白運動的重要性,早前參加了賽馬會樂動網球計劃,學打網球。

 

中風始拾球拍

今年六十四歲的阿娣,在球場上行動自如,誰不知五年前右邊腦中風,曾一度癱瘓,需以輪椅代步。「有次因工作關係要返內地,點知中途暈低咗,送去醫院做咗八個鐘頭手術,醒番就郁唔到,好想死。」她指以往日日為口奔馳,沒時間做運動之餘,亦有血壓高的問題,「當日就係唔記得食血壓藥,所以中風。」

自此,阿娣便知生命有時,健康卻無價,即使坐在輪椅上,仍每星期去公園練氣功,「練咗年幾就行得番,之後游水、羽毛球、太極,乜都學過。」雖然如此,她從未想過學網球。「因為朋友話實跌死我,叫我唔好去學。」直至一日,她在家附近的長者中心看到宣傳單張,標明供長者報讀,才膽粗粗報名。

阿娣參加的,是由香港賽馬會慈善信託基金捐助,夥拍香港網球總會推行的「賽馬會樂動網球計劃」。計劃在去年九月開始,為期三年,主打小學生、有特殊學習需要的小朋友、體育老師及長者,為他們提供為期一年的網球訓練課程。單是長者班,全港已有十八班,球拍、球衫和學費全免。負責執教的陳教練說:「我哋專登用畀小朋友用嘅橙色網球,速度比正常的慢,等班長者容易打。」

陳教練續指,網球是門劇烈運動,不少長者都跟阿娣一樣「怕跌親」,因此課程重步法和揮拍訓練,「郁動盡量少,過頭波盡量唔接,慢慢學。」在教練細心的教導下,阿娣笑指自己一學便愛上,「可以郁動吓,一啲都唔危險,仲可以識到一班波友。」

網球班主打銀髮一族,課程着重訓練學員姿勢、步法和揮拍動作。

 

阿娣(右一)、王明( 左五)及梁笑如(左四)在網球班上認識了一班波友,自得其樂。

 

感染身邊人

阿娣的其中兩名「波友」,王明跟他的太太梁笑如,跟阿娣一樣,退休前日日忙於工作,缺少運動,結果大家因網球而結緣。「原本我老公唔願咁早起身,無報名,後來學咗兩、三堂,見我話好玩,佢就報埋名。」王太說。

王先生笑指,雖然網球班在大清早開班,但他一學便從此對每個星期二都滿有期待,「等咗成個禮拜今朝卻落雨,以為無得學好唔開心。」學了幾堂,他指閒時會跟太太研究姿勢和步法,兩口子自此多了個話題,「大家恩愛咗、開心咗,人頭腦都靈活啲。」他續說。

王生、王太學得高興,更矢言日後想參加比賽,「得閒就租場一齊打。」而阿娣同樣矢志要參加比賽,但她無奈地說:「我叫老公陪我打羽毛球,要求佢先肯去,打一陣又話尿酸發作。想佢陪我學、陪我練?唔使旨意。」此時,身邊的王先生即時插嘴說:「我都有尿酸問題喎!你叫你老公嚟,我幫你游說佢學。」說罷,阿娣即時笑逐顏開,說:「好啊!成功我請你飲茶。」

另一位負責執教的高教練指,平日開班,不時有途人經過看到,主動上前詢問如何報名,可見長者網球班確有市場。如此一傳十,十傳百,有助推廣網球運動之餘,還可將快樂傳揚。陳教練則笑指,這班長者學員還愈學愈專業,「唔打得都睇得」,「第一堂好多着休閒服嚟上堂,第二堂個個着晒網球鞋,再過幾堂換番網球褲,有學員仲話專登買個執波籃返嚟。」對這班長者來說,「打得」也許真的不重要,難得開心才最緊要。

王明跟太太梁笑如自從參加了網球班後,自覺精神好轉,兩夫妻亦更恩愛。

 

王明指其他波友都對網球班滿有期待,訪問當日下雨,有學員更大呻「打波先嚟落雨」。

 

教練:為教波學古箏

擔任私人教練多年的陳教練,被一班長者學員捧為「最有耐性的網球教練」,誰不知她卻指自己也常有教練脾氣,「單係教握拍方法,分東方式同大陸式,講幾個月,班學生都係記唔到,但佢哋又想改好,偏偏學唔識,我都會唔耐煩。」她說。

為此,陳教練早年嘗試放下教練身份,轉做學員報名學古箏,結果一學便明白學生心態,「手指學極都唔靈活,就好似我班學生一樣。」自此,她便明白教班需要有無比的耐性,教曉徒弟亦不是首要目的,「乜都講多幾次,每次都提點。最緊要學生學得投入,想嚟上堂,叫多啲朋友參加。」

陳教練所說的,正是計劃的目的。賽馬會慈善事務部主管陳淑慧亦表示,「馬會一直積極支持社區體育,期望透過計劃令社區不同階層市民皆有機會參予網球運動,享受箇中樂趣。」

陳教練(左)跟高教練(右)皆認為教長者打網球,最重要的是安全和要有耐性。