為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 05 月 06 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

心度紀錄

電影唔單止可以娛樂大眾,有時更加係反映現實嘅渠道,好似即將上映嘅《同囚》,就以少年囚犯喺勞教中心嘅生活作題材,將鮮為大眾所知嘅事件搬上大銀幕,實為既有心又有深度嘅作品。

今次「Paco巨星飯堂」,就邀請電影嘅監製梁鴻華(Tony),連同男主角游學修、譚嘉荃(Amy)同喬寶寶,去到位於觀塘嘅「The Hunt Coffee & Roastery」,一邊品嘗西式美點,一邊暢談電影背後嘅故事。

即將上映嘅《同囚》,講述勞教所少年生活,由資深電影人梁鴻華(前)監製,幕前有游學修、喬寶寶同譚嘉荃演出,係一部有heart嘅製作。

 

反映現實

講述囚犯生活嘅電影,最經典就必定係《監獄風雲》,今次《同囚》嘅主角,雖然都係囚犯,但係有別於經典,電影以少年囚犯為焦點。監製Tony表示:「寫呢個劇本係一段緣份,我哋有一個慈善機構,一直幫緊呢啲『同學仔』(獲釋少年囚犯),包括提供免費課程畀佢哋,讀一啲同電影有關嘅專業,令佢哋有機會入行。有次我同佢哋tea,閒聊間講到佢哋喺獄中嘅生活,佢哋講得太淡淡然,成日講『係咁o架啦!』,咁樣令我有好大衝擊,而且有好多細節好有趣,好適合拍成電影。」

身兼電影統籌同演員嘅Amy,對劇本「一見鍾情」。「我睇咗唔少劇本,但係一睇呢個劇本就覺得好震撼,因為我知道入面有好多係一啲前少年囚犯嘅親身經歷,於是我說服公司開拍呢部戲。演員搵阿修同關楚耀外,仲有麥以馬,佢曾經喺勞教中心服刑,演起嚟更加投入。」

我帶一眾嘉賓去到位於觀塘嘅「The Hunt Coffee & Roastery」,一邊品嘗西式美點,一邊暢談電影背後嘅故事。

 

今次電影嘅故事,有唔少情節係由曾經喺勞教所服刑、現已重回正軌嘅麥以馬﹙右二﹚提供,當中有佢嘅親身經歷。

 

Latte($38),醇厚咖啡加上香滑奶泡,係滿分嘅配搭。

 

Rose Raspberry Cappucino($48),入口有淡淡玫瑰香,相當清新。

 

Hail to The King Burger($158),以自家製牛肉漢堡扒製作,只此一家。

 

難忘全裸

講到戲中角色,阿修話:「我飾演嘅角色叫『阿丹』,佢嘅古仔就係以馬嘅經歷,而且戲入面飾演其他同囚嘅演員,有唔少係喺呢十年,曾經入過勞教中心服刑嘅前囚友。嗰時我拍嘅第一部戲(《哪一天我們會飛》)啱啱上,啲觀眾都未認得到我喺嗰部戲嘅造型,我就要為呢部戲剷頭,剷完個頭嗰陣,我literally係一個監犯,加埋日日要畀人打,搞到我對成個過程都好難忘。」

有真實人物參考,阿修喺戲中被打都有「專業術語」。「打嘅方式係以馬憶述嘅,『落雞翼』係個犯彎低身,畀阿Sir喺背脊批踭,佢話有啲阿Sir好有型,會跳起再一下鋤落嚟。 『芥蘭』就係批踭鋤落去大髀叫做『麻痺雞』嘅筋位。 『刨冰』係用拳骨錐落肋骨位。 『快車』係用警棍打腳板,以馬話第二日步操會痛到想死!」

被打以外,阿修仲話拍臨時加嘅全裸出浴戲時,一樣難忘。「導演突然加呢場戲,喺個個都黐膠紙防走光嘅時候,我就豁出去,咁我覺得沖涼唔着衫好正常啫!佢哋見我咁勇,就齊齊剝光豬,場面都幾壯觀o架。」

阿修係新世代演員嘅代表人物,今次佢為部戲更加作全裸演出,專業精神可見一斑。

 

戲中飾演少年囚犯嘅阿修,同「懲教主任」關楚耀交流最多。

 

燒羊架配青瓜薄荷醬($168),色香味俱全。

 

自家製香橙橄欖油龍蝦意粉($168),香而不膩。

 

Tiramisu($58),濃滑味美。

 

Little Prince of Rose($52),以荔枝及玫瑰製作啫喱及雪糕,味道夾得啱啱好。

 

監房文化

曾經服務懲教署十六年嘅喬寶寶,可謂戲中另一親身經歷過「監房文化」嘅人物。「雖然我喺嗰十六年入面,冇喺勞教所工作過,但係我知道要喺部戲入面做監督嘅角色之後,我都有自己再去做一啲research,請教吓啲舊同事,研究吓點樣做得實在啲。

「為咗呢部戲,我都有少少犧牲嘅,識我嘅人都知道喬寶寶係唔講粗口嘅,但係以『監房文化』嚟講,粗口係在所難免嘅,所以我喺一兩幕戲入面,都有講粗口。」

今次因劇情需要而爆粗,令寶寶諗起往事。「以前去守船民營,我都要去上堂,學一啲越南粗口,唔係因為要講,而係咁先知道啲人話緊我哋。」

 

 

除咗喺戲中飾演心理學家,Amy亦身兼電影統籌,就係佢拍板開呢部寫實作品。

 

Tony喺八十年代演出過多部TVB劇集,後來全力喺幕後發展,同喬寶寶一樣係實力派代表。

 

曾經喺懲教署工作十六年嘅寶寶,為咗做好今次嘅勞教所監督角色,亦做過一番資料搜集。

 

Tony喺八十年代演出過多部TVB劇集,後來全力喺幕後發展,同喬寶寶一樣係實力派代表。