為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 05 月 03 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

法國五月

五月一日係地球上好多國家,好似中國、法國、瑞典、瑞士等嘅勞動節(Labor Day or International Workers' Day),香港喺5月除咗有勞動節呢個法定假日之外,仲有自1993年就舉辦嘅Le French May,聽講法國五月仲喺咁多年嚟為本土呈獻超過500個藝術文化項目,今年就以法國國家藝術寶藏「巴黎羅浮宮」展覽揭幕,我諗有時間都值得去睇吓。

從我只去過法國以至歐洲旅遊嘅角度嚟睇,法國人或者歐洲人對生活同食物中美嘅追求,直到今日仍然保持着一份堅持同執着,喺法國同好多其他歐洲國家,星期日喺家庭日,當地人好享受同家人嘅生活空間,好多企業喺呢日唔會開門做生意嘅。歐洲人對追求寫意生活嘅態度,仲會隨時隨地活生生咁喺平常中就可以體現到,例如7或8月去歐洲旅行,隨時會發現當地有舖頭掛着「Go Tanning」去曬黑嘅告示牌喺門口,即係話俾大家知東主想曬太陽要去沙灘,今天關門唔做生意喇,最好笑嘅係其實個牌都唔知喺嗰度掛咗幾耐,可以無拘無束、自由自在咁生活,又的確令人有啲羨慕同神往。當然你可以話阿叔我隨時都可以揀咁嘅生活,但可以日日透過唔同渠道、同大家交流同溝通,我仲真係好享受做嘢囉,所以暫時未捨得退休去過咁hea嘅生活,哈哈。

有朋友好誇張咁話法國嘅香檳同紅酒,法國嘅珠寶同手表,法國嘅衫、褲、鞋、同袋都係好嘢,巴黎嘅香榭麗舍大道(Avenue des Champs-Elysees)又出名可以見到好多俊俏嘅男士同女士,總之有「法國」呢兩個字嘅出品就必屬佳品咁話喎,不過我英國嘅朋友就一定唔會同意呢點喇。

講開法國又一定要提下嚟緊嘅大選,根據IPSOS出口民調,中間派總統候選人埃曼努爾.馬克龍(Emmanuel Macron),第一輪得票率暫時係百分之二十三,領先勒龐 (Marine Le Pen)嘅百分之二十一,佢哋兩人將會喺第二輪5月7號投票中再爭過,總統誰屬好快就知。自2012年馬克龍擔任總統府副秘書長起,期間雖曾任法國經濟部長,但反對派認為佢從政時間短,當馬宣布競選政綱時,對手仲笑佢對所有嘢既支持又反對,無重點兼模棱兩可,即係講咗等如無講過,不過講真世界各地好多政客咪又都係咁。

睇到報道嘅轉載都話極右翼嘅勒龐有口才,法國以至全球依家都受到恐怖主義威脅,佢從政第一日起就聰明地反移民迎合選民,當然仲有佢爸爸政治光環嘅加持,我唔知到時大選結果最終會唔會似美國總統特朗普(Donald Trump)嘅勝選,又或者似英國公投脫歐咁戲劇化,不過無論邊位勝出,勝出嗰位就一定要有政治智慧,兼要以法國福祉為基本先係最重要囉。

法國將於五月七日舉行總統大選, 目前民調以中間派候選人馬克龍領先,但其實他當初宣布競選政綱時, 曾被批評言論模棱兩可。