為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 04 月 28 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

七.三=港經典

三同七嘅組合,通常會令人聯想到「三七二十一」,但將呢兩個數字代入即將上映嘅電影《春嬌救志明》,就衍生出唔同嘅意思。導演彭浩翔喺七年間,以主角千嬅同余文樂,炮製咗代表香港嘅愛情故事三部曲,直情係經典!

今次「Paco巨星飯堂」,我就誠邀彭導同千嬅,加上戲中「春嬌」嘅搶鏡閨密陳逸寧(Isabel)同「Brenda」林兆霞(June),去到位於太子嘅「大紅袍火鍋料理」,打住邊爐講呢個因「打邊爐」而開始嘅經典系列。

有電影系列嘅大腦彭浩翔、主角千嬅,加上兩大搶Fo綠葉Isabel(左)同June(右),現場氣氛梗係同《春嬌救志明》一樣,妙語連珠。

 

度橋超嚴謹

苦等五年,終於有得睇「志明春嬌」電影系列嘅第三集《春嬌救志明》,彭導坦言花咗幾年時間度橋,全因佢今次想探討兩性關係嘅危機。「有次諗起311大地震,我身處東京嘅經歷,覺得一個人嘅性格,喺平時相處係睇唔到嘅,而係要喺危難時嗰幾秒鐘,先會見到真性情。我覺得呢個係情侶一個好重要嘅關口,於是就決定由呢度出發,寫志明同春嬌嘅故事。」

跟「春嬌」同步成長嘅千嬅,就坦言今次埋位有壓力。「大家喺現場會排好多次先埋位拍,啲對白要講到好精準,導演搵咗Paul哥(秦沛)做我爸爸,藉着父母嘅感情,引伸到伴侶之間嘅利害衝突。成件事會影響咗我對家庭嘅價值觀,呢度開始有少少drama,對我嚟講係有難度,唔係話之前嗰啲好容易拍,而係今次個角色嘅層次唔同咗,我亦見證到導演喺性格上比以前成熟咗。」

導演以紅酒去比喻戲中另一主角余文樂。「阿樂呢幾年嘅演出愈嚟愈成熟,就好似紅酒咁,啱啱到咗一個位,我覺得係好嘅,你睇番第一集啲片段,就會發覺佢由男仔慢慢變成男人,而千嬅就由少女變成魅力所在。」

我帶一眾嘉賓去到位於太子嘅「大紅袍火鍋料理」,真係打住邊爐講呢個因「打邊爐」而開始嘅經典系列。

 

呢一幕講述千嬅以護士制服誘惑樂仔,不論鏡頭前後都充滿笑聲。

 

音音姐(下圖)喺系列中一直飾演「春嬌媽」,今集追加另一演技派Paul哥秦沛(右圖)飾演「春嬌爸」,令故事更紮實。

 

 

 

迷你刺身拼盤($368/4人份),包括海膽、牡丹蝦、帶子同三文魚,鮮味!

 

四川麻辣湯鍋($80),麻辣度獨一無二,極具四川真正風味。

 

金屋藏嬌($168)嘅「金屋」,係指餐廳秘製嘅黃金湯底,而「嬌」就係鍋底嘅半隻嫩雞,加上頂級花膠、竹笙同蟲草花等配料,非常滋味。

 

欺凌「護士仔」

千嬅一聽到呢個「評語」,就即刻笑住鬧導演。「我知你想講乜!頭先你話見證我進入更年期吖嘛!其實導演同阿樂係黐埋一齊嘅,鏡頭後就『校園欺凌』我、騷擾女演員,鏡頭前就充滿愛⋯⋯」

之後佢又轉用認真mode講:「可能因為大家都好熟又信任對方,所以可以瞓身去演,唔使有太多猜度,我只需要直接配合,包括被迫着護士衫,我係前護士,以前我一定唔會着!但係今次都屈服,因為我係『專業』嘅,而呢兩個字亦令我人生改變咗!」

彭導即笑笑口安撫千嬅話:「你平時係護士,但我哋要你着嗰件衫係『護士仔』嘛,有少少唔同嘅。不過,唔知點解拍完牀戲,件情趣內衣唔見咗,我覺得OK嘅,如果演員自己鍾意係可以攞返去!」

千嬅聞言即大聲慘叫:「真係慘!起初我以為係咩可歌可泣好鏡頭,點知好似拍《殺破狼》咁,純肢體格鬥,我嘅翻滾次數唔會少過張晉囉!我淨係着嗰件衫出嚟,佢哋喺現場嘅興奮程度已經不得了,完全拍唔到,又講唔到對白,阿樂又好尷尬,成個人硬晒軚,件晨褸仲要綁死結!」

影后千嬅嘅表現,自然不用置疑,佢演繹嘅女性中年危機,令觀眾笑中有淚。

 

《志明與春嬌》同《春嬌與志明》均為港產片經典,發展到第三部曲,特別令影迷期待。

 

 

 

三度合作,千嬅同樂仔更見默契。

 

極上牛肉刺身($128)配上洋葱,入口既鮮且甜。

 

鬼馬蝦膠($58),一邊香脆一邊彈牙,層次分明。

 

極級本地手切肥牛(大$258/例$198),嫩滑又有嚼勁。

 

友情MKB

除咗千嬅同阿樂兩大主角,電影系列仲有「春嬌」嘅幾位閨密,今次Isabel同June仲同千嬅組成「MKB48」(Mega Karaoke Bitches),電影未上映,佢哋嘅〈傳說〉已經唱到街知巷聞。

喺上集同黃曉明打得火熱嘅June話:「導演喺兩年前已經叫我哋練呢首歌,但係嗰時我仲未知道佢諗住點用,佢叫我練就練啦!之後拍嗰場戲,我同Isabel喺現場都係自由發揮,出嚟都OK吖。」

上集憑一句「腿張開」彈出嘅Isabel,今次喺宣傳時就試過收唔切掣爆粗,「今集我喺戲入面都有爆,係劇情需要嘅。拍咗咁多集,成個team都有晒默契,一埋到位就自動波交貨,係拍得好開心嘅。」

Isabel同June喺系列中甚為突出,今次仲同千嬅組成MKB48,為電影原聲碟唱Raidas嘅〈傳說〉。

 

彭導強調要諗到好橋先開拍今集,令陪住觀眾成長嘅春嬌同志明,繼續「貼地」。

 

千嬅喺戲中嘅閨密一樣原班人馬上陣,閻汶宣、谷祖琳、Isabel同June(左至右),對白、表現都依舊搶鏡。

 

新鮮鴨血($35),係麻辣鍋嘅最佳拍檔,爽口又入味。

 

招牌餃($88)即黑松露蟹肉餃,落足料自家製。

 

大紅袍火鍋料理
地址:九龍太子彌敦道777-781號寶安樓2樓
電話:2702 2922