為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 04 月 13 日

林鄭行會、內閣大換班 疑似政黨推薦名單曝光

林鄭月娥周日上京接受任命,七月一日成為本港首位女特首,佢嘅管治團隊組班情況備受關注,其實行政會議非官守成員班子都要大執位。政圈流傳,除咗身兼林鄭競選班底嘅現任行會成員陳智思同查史美倫,以及鄉議局副主席張學明有望留任,未知其餘十二個成員的去留。

據了解,表明暫代民建聯主席李慧琼入行會嘅葉國謙都有意退下來,另外張志剛及羅范椒芬也可能離任。有建制中人說:「葉劉早前選特首辭任行會,再入去嘅機會唔大。新民黨應該無合適人選補上,至於葉國謙個位就應該由民建聯副主席張國鈞代替。而做過兩朝嘅胡紅玉,以及港交所主席周松崗、廖長城等人,留低嘅機會就一半一半。」

同時,行會召集人林煥光早前已表明唔再做,屈指一算,下屆行會最多可能出現八張新面孔。有傳幫林鄭諗有關財金政綱嘅前金管局總裁任志剛,係下屆行會召集人大熱人選,「任總想不問世事,行會工作唔太困身,啱晒佢。」至於其餘嘅人選,相信好快會知花落誰家。

另外,林鄭銳意引入「管治新風格」,有意邀請各獨立決策局自薦管治人選,以及歡迎各黨派自薦人才入管治班底,盛傳建制派三大黨民建聯、工聯會及經民聯,已度緊名單交畀林太。

民建聯(民記)中人透露,商務及經濟發展局局長蘇錦樑嘅政助陳百里、民政事務局局長劉江華嘅政助徐英偉、三十四歲沙田區議員李世榮,以及五十歲大埔區議員胡健民榜上有名。「蘇錦樑同劉江華都係民建聯出身,蘇應該唔大機會過渡下屆,但我哋好想劉江華,以及兩位政助可以留任。」

呢位民記中人話,佢哋推薦嘅四個人之中,以陳百里及胡健民呼聲最高,學歷及資歷好適合做政助或副局長,後者仲喺倫敦帝國學院畢業,回流後白手興家自設廠房,「希望推舉陳百里再上一層樓做副局。」

之不過,若果推薦現任區議員加入問責團隊,就要辭去議席,有民記高層擔心補選未必攞得番席位。工聯會黃國健都贊同呢個睇法,據悉佢建議將人才據為己用,壯大工聯會,但該會理事長吳秋北就認為,呢個係難得嘅機會,正物色有抱負、有齊議政同從政材料嘅黨員,推薦畀林太。

新政府即將上場,行政會議班底亦可能大執位,有傳最多有八個新面孔登場。

 

有傳民建聯向林鄭推薦胡健民(上左)、陳百里(上右)、李世榮(下右)及徐英偉(下左),進入新政府班子中。

 

日前上京接受任命嘅候任特首林鄭月娥,正忙於籌組管治班子,行會也可能要換班。