為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 04 月 16 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

超強陣拆彈

踏入四月,強陣港片排住隊上映,當中包括由劉德華自監自演、耗資超過1.8億港幣製作嘅《拆彈專家》,除咗動作爆破場面刺激感官,台前幕後都Man到爆!今次「Paco巨星飯堂」,我就誠邀導演邱禮濤(Herman)、吳卓羲、石修同駱應鈞,細說大製作背後嘅小故事。

我帶四位嘉賓去到位於金鐘嘅「BRICK LANE」,以英倫特色菜挑戰味覺,配襯電影帶嚟嘅視覺震撼。

(左起)阿羲、Herman導演、修哥同鈞哥嘅組合,陽剛味濃外,演戲嘅實力更加令人充滿信心。

 

盛讚劉德華

電影選定以炸彈恐襲為題,導演Herman仲堅持大部份實景拍攝,務求拍出爆炸場面嘅真實感。「呢個古仔同一般警匪片唔同,我哋集中講EODB(Explosive Ordinance Disposal Bureau、爆炸品處理課),香港嘅EODB只得十幾名隊員,主要做同爆炸品有關嘅案件。好似近期香港大學發現戰時炸彈,都係由佢哋處理,我對呢個團隊好有興趣,十幾年前適逢其會,認識咗香港首個華人拆彈專家袁Sir(「拆彈一哥」袁漢榮),對EODB嘅運作亦加深咗了解,所以就拍咗呢部戲。」

Herman仲有誠意到花近十年時間,去研究炸彈類別。「決定開呢部戲之後,仲密集式去學爆炸品嘅類別,好似咩係TNT、塑膠炸彈,佢哋係點做?威力幾大?秒速達幾多?我甚至走去EODB總部,睇佢哋啲拆彈工具、炸彈dummy,仲有一啲已沒爆炸威力嘅真炸彈。」

導演不忘開口大讚劉德華,「三年前第一次同華仔傾合作,佢竟然可以即晚睇晒成個劇本,仲度埋檔期演出,真係好專業!佢仲兼任監製,但係每件事都跟得好足,令成隊crew拍得好smooth。

「其實華仔真係拍得辛苦,每次拆彈着嗰套防爆衣,就算嗰件只係仿製品,但比真嗰件輕好少。我哋喺灣仔拍炸彈發現案嗰時,一日落大雨,一日就曬到七彩,佢着住件衫一陣都成身濕晒。換轉其他人可能會好忟,但華仔唔會,佢脾氣幾好,拍動作場口又會好投入,佢係好勤力、好專業、好愛電影嘅演員,可以同呢種演員合作係好開心嘅。」

我帶今年「寰宇」重點製作《拆彈專家》嘅最Man班底:駱應鈞、邱禮濤導演、吳卓羲同石修(左至右),去到位於金鐘嘅「BRICK LANE」,品嘗富英倫特色嘅菜式。

 

 

 

華仔擔正又兼任監製,每個鏡頭擺位佢都跟足,仲要身穿重達幾十磅嘅防爆衣,事事搏到盡。

 

輕煎吞拿魚扒($269),夠晒健康。

 

酥皮健力士牛肉批($168),另一英倫味濃厚嘅菜式,以健力士啤酒炮製嘅牛肉餡料,相當惹味。

 

炸魚薯條($168),係最經典嘅英倫菜式,我欣賞菜式皮薄魚鮮。

 

認真做功課

至於從電視跳進大銀幕嘅阿羲,就飾演華仔嘅副手,「戲中我主要跟華哥工作,拆彈組出勤主要兩個人,華哥係No.1、我係No.2,佢職責係要行埋去個炸彈度,判斷用咩方法去拆彈,而我係佢嘅助手,大家要好有默契。」

為演活角色,阿羲埋位前都要先上有關炸藥嘅理論課,又跟華仔同導演,走入EODB總部學拆彈知識,做足功課先埋位,難怪導演都大讚:「阿羲之前做好多電視劇,但電影唔多,加上今次角色唔係經常可以遇到,所以觀眾會有新鮮感。」

華仔出名要求嚴謹,阿羲都話:「一開始知要同華哥拍戲,已經好大壓力,好在佢會主動跟我哋這班後輩演員講吓笑,緩和吓氣氛,我都relax啲。喺現場見到華哥真係好忙,每個鏡頭擺位都會跟到足,又會好仔細咁睇每個演員嘅表情動作,不過唔係話要指定我哋跟足佢嘅方法去演,而係好放心讓我們自由發揮。

「我記得自己第一場戲嘅對白,就係要講解爆炸品嘅結構資料,由炸彈嘅製造年份、威力、秒速,都要一口氣讀出,對白好長,我背得好辛苦,但重點係華哥就坐喺頭排睇住我,都NG咗幾次佢先收貨。」

首次主演電影,阿羲除咗感激華仔同導演畀空間佢發揮,仲為角色做足功課,專業態度攞滿分。

 

戲中飾演拍檔嘅華仔同阿羲,都特別去警察爆炸品處理課總部「取經」,絕不馬虎。

 

鏡頭前要處理動作場面嘅仲有姜皓文(右),鏡頭後佢都要同Herman(中)研究,務求做出最佳效果。

 

香草燒春雞($238),嫩滑嘅雞肉同燒汁甚夾。

 

蒜椒欖油鮮蝦炒意大利粉($178),少油微香辣,極考炒功。

 

燒黑安格斯牛($235)相當juicy,為餐廳brunch餐單菜式。

 

鑽級綠葉王

有華仔飾演英雄,電影中嘅周邊角色亦不可忽視,戲中有智叔廖啟智飾演大商家,而修哥同鈞哥,都分別為呢部大製作增添唔同嘅戲味。修哥話:「我喺戲入面飾演警隊嘅高層,負責面對傳媒同去『紅隧』現場做決策。本來都幾舒服嘅,但係導演好睇得起我,喺臨尾都畀咗啲動作戲我做,觀眾入場就要留意嘞!」

鈞哥就負責戲中嘅「洋葱位」,「我飾演一個退休警員,同BabyJohn係一對父子,佢因為我而去做警察,喺『紅隧』畀恐怖份子挾持之前,仲好開心咁去打波,點知BabyJohn喺被挾持期間,跌咗個pass出嚟⋯⋯唔劇透住,總之我覺得呢段戲幾有張力,有啲味道嘅。」

講到父子情,就要提吓早前榮升老爺級嘅修哥,「哈哈!我冇催阿Sam(陳宇琛)畀孫我抱,呢啲等佢哋自己話事啦!」

一早被外界肯定演技嘅修哥同鈞哥,不但喺電影中合作,二人私底下亦甚為friend底,大有識英雄重英雄之感。

 

 

 

修哥喺戲中飾演警隊高層(上圖),鈞哥同BabyJohn就分飾現役及退休警員父子,各有發揮。

 

卡邦尼意大利粉($168)配上溫泉蛋,提升味覺享受。

 

烤澳洲神戶和牛($345)嫩滑嘅烤和牛配上約克郡布甸,更有英國味道。

 

BRICK LANE
地址:金鐘添美道1號中信大廈4樓404號舖
電話:23632500