為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 03 月 30 日

林鄭當上女特首 「第一先生」會做乜?

前政務司司長林鄭月娥當選,成為香港回歸廿年以來首位女特首,佢老公林兆波就成為香港史上首位「第一先生」。睇番過去三屆嘅特首,佢哋嘅另一半都會擔任唔同嘅公職,其中女童軍總會嘅會章更列明:「總會會長應為香港特別行政區行政長官的夫人」出任,但下任特首嘅另一半係男人,女童軍總會會點做?成為城中熱話。

不過,女童軍總會似乎未必認為由「第一先生」順理成章接任,佢哋發言人回應話,如果特首沒有夫人,就由執行委員會推薦合適人選做會長,「呢個人選只要係香港居民,致力推動整體女童軍運動,佢嘅性別沒設限,執行委員會將討論今次特別情况。」

一九六八年成立嘅香港公益金都面對同樣情況,但香港公益金發言人回覆本刊稱,會長一職在回歸前後,傳統上主要由特首夫人出任,至於下一屆會長人選則「待定」。

林鄭嘅老公林兆波係數學博士,多年來為人低調,儀表更加唔多重視,佢甚至同其他人透露最唔鍾意剃鬚,「佢唔介意做女高官背後嘅男人,但介意改變生活態度。」據悉,林鄭唔想自己從政影響老公及家人嘅生活,所以未必會安排老公做公職。

過去三屆特首夫人,都熱衷參與公益活動,擔任唔少個慈善及制服團體嘅名譽職位,佢哋嘅活動安排亦由特首辦公室提供支援,好似現任特首夫人梁唐青儀先後擔任七十四項公職,但要數公職最多嘅,應該係首任特首夫人董趙洪娉,據報佢曾出任八十多項公職。

中文大學社會工作學系助理教授碧樺依話,華人社會嘅政界一向以男性主導,多數領導人係男人,香港出現首位女特首,正好畀社會反思兩性定位,「參與慈善唔一定要夫人先做得,只要係特首嘅配偶,唔理男女都可以吖。」

特首「另一半」做公職有政治意義,意味政府重視該非牟利機構。睇番外國嘅例子,唔少女領導人嘅另一半願做跟得先生,好似德國總理默克爾嘅丈夫,就試過陪太太出席國際會議,同各地領導人嘅夫人聯誼。

林鄭(左)成為首位女特首,佢老公就成「第一先生」,會唔會仿效其他特首另一半出任公職,頓成城中熱話。

 

歷屆特首夫人都係女童軍總會嘅會長,如果林兆波唔做得,咁好有機會由林鄭自己做番。

 

德國默克爾嘅丈夫(左二)係跟得丈夫,唔介意出席各國第一夫人嘅「太太會」,做親善大使。