為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 04 月 02 日

絮語 林二汶

林二汶的聲線,猶如春天裏剛盛開的花,溫婉細膩又潤澤,跟她做訪問,既是享受,也會很愉快,皆因她領悟力很高,思想愛漫遊,是個表達能力很強的人,幾乎任何事情,她都有很多話想說,巴啦巴啦,哈哈哈哈,零dead air。

「講嘢呢方面,盧凱彤(Ellen)好了解我,佢會知道我差唔多講咗十句垃圾之後,先會講重點,所以佢對我好有耐性,好多時都係聽晒先會答番我,哈哈哈!」她自一○年脫離at17,跟Ellen各自單飛後,便選擇做自己老闆,由一位自資出碟、開騷的女歌手,一直進化成今天新世代最嚮往的多重職業身份:Slash。「我係歌手,又係VO talent(聲優),仲係producer、composer、演員、主持、DJ同專欄作者……」

日子有功,每個身份的工作,對她來說已成了專業,讓她見識了不少,單是提到她四月底跟中樂團合作的《最難唱的情歌》音樂會,騷還未開,她已體會至深,說着說着,已說到「鹹鹹濕濕」的黃梅調去;談到音樂會揀唱了王菲的〈寒武紀〉,她又會自自然然地哼起來;繼而話題忽然又會轉到她的聲線、自資、at17、Ellen、減肥、婆婆、錄廣告…… 與其說這是一個訪問,查實更像節錄下來的一段段絮語。

 

 

我阿婆

林二汶跟中樂團合作的這個音樂會,最特別的一環,是有二汶哥哥林一峰當嘉賓,兩兄妹在台上向外婆作致敬,很有意思。

由細到大,外婆影響我哋兩兄妹最深,係我哋心目中真正嘅diva(台上女神)!

佢後生嗰陣唱潮劇,係台上嘅女伶,亦都係遺傳我哋兩兄妹唱歌嘅脈。我阿哥為呢一part特登寫咗兩首歌,一首由周耀輝填詞,叫〈搖到外婆橋〉;另一首,我阿哥填,叫〈葉問〉,一來呢個人物,將詠春承傳畀後人,二來可以解釋為一塊葉去問問題:不斷向外生長,每日向住個天空搵答案,但其實答案本來就喺條根度。就好似我哋一路咁成長,一直都搵緊自己係個乜嘢嘅人,要去邊,其實好多時,呢啲答案已經可以喺自己父母或屋企嘅長輩度搵到。

一峰、二汶兩兄妹愛錫外婆之餘,林媽媽(左)也不時在社交網上載母女合照。

 

我介意

雖然外界普遍也會認為,二汶擁有一把靚聲,加上唱功紮實,演唱任何歌曲也會很動聽,但她卻說,唱歌,她還有自己介意和欠缺的地方。

我其實冇覺得自己識唱歌!中樂團呢個騷,我想tribute一啲影響我哋呢代女歌手嘅diva,揀咗梅姐(梅艷芳)、(林)憶蓮同王菲啲歌,淨係梅姐首〈似是故人來〉,已經令我好擔心!我嘅聲音range係大,但去到呢啲感覺好重嘅歌,把聲幾靚都冇用!

我有好多好harsh嘅朋友話過我:「你把聲係靚,但你啲感情唔夠囉!」聽得多,我自己都上晒心、好介意,我無論擺咗幾多感情落去,啲人都覺得我唔夠,有時我會忟:咁點啫?我把聲係咁滑呀嘛,唔通我要整爛佢咩?

係我嘅監製于逸堯教曉咗我,唱歌,最重要係認識多啲自己係個乜嘢人,想唱啲乜嘢,聲靚唔靚唔係重點。因為阿于,我嘅唱歌嘅領域,真係大咗好多!

 

 

跟中樂團合作,二汶不諱言很有壓力,「呢個騷係我一個里程碑,所以我揀啲歌都好難唱,好有野心。」