俗語話「上陣不離父子兵」，我就邀請一對知名嘅母子兵：郭秀雲（Sharon）同龐景峰（Andrew），擔任今次「Paco巨星飯堂」嘅嘉賓。Sharon近年致力推廣環保意識，保護生態環境同瀕臨絕種動物；Andrew就繼承父母衣缽，投身演藝圈作三棲發展，各有使命。

我帶佢哋去到位於饒宗頤文化館嘅「頤膳房」，品嘗特色fusion菜，暢談執行「使命」嘅喜悅。

Sharon同Andrew呢對深入民心嘅「母子兵」，今年喺唔同範疇上都各有使命。

贏在DNA

廿七歲嘅Andrew，盡得父母真傳，「可能因為咁，so far我拍嘅電影都要打。」佢身旁嘅Sharon就表示：「Andrew自細就擅長記動作、舞步都好叻，佢細個學花式溜冰，仲有好多舞蹈：芭蕾舞、Break Dance，所以train得好好。」

入行後，Andrew除咗有錄歌，仲拍咗四部電影，包括同爸爸錢小豪合作嘅《生化藥屍》。「部戲有好多老前輩演出，除咗我老竇，仲有吳耀漢、樓南光。我喺戲入面飾演我老竇嘅年輕版，拍嘅時候佢都有教我好多嘢，譬如點樣打得好睇啲、動作嘅流暢度咁⋯⋯」

喺DNA上已盡得「功夫底」，最近我睇埋Andrew一個訪問，知道佢仲係跆拳道高手，真係後生可畏。「之前我喺每年暑假都會代表香港，參加跆拳道黑帶嘅比賽。因為自細接觸功夫，我對武術特別有興趣，去年仲玩埋Spartan Race（斯巴達障礙賽），我覺得好好玩！」

我帶Sharon同Andrew兩母子到位於饒宗頤文化館嘅「頤膳房」，既感受到館內獨有嘅文化氣息，又可品嘗餐廳嘅特色fusion菜式。

Andrew為跆拳道黑帶一段高手，凌空一字馬踢板，對他來說可謂駕輕就熟。

腐皮扣釀上素髮菜（$60），清淡得嚟又有性格。

黑松露素鵝（$108），糅合中菜跟西方食材，fusion味濃。

烤大啡蘑菇配中東小米（$108），炒得粒粒分明嘅中東小米，嚼感特別。

瞓身為環保

囝囝努力發展演藝事業，Sharon就對宣揚環保意識不遺餘力。「我覺得全球嘅環保運動都可以做得好啲，好似照顧瀕危物種、保護海洋生態咁。有一次我去一個保護海洋生態嘅function，同場有好多小朋友，我問佢哋一見到個海會諗到啲咩？佢哋好多都只係答污染、海鮮好好味，仲有海景，因為層樓見到海景就可以賣高啲價。

「我想佢哋知道海洋對生態環境好重要，個海一病咗就全球人都受牽連，所以我拍咗一部紀錄片，係講海洋、鯊魚嘅，係IMAX 3D版，喺入面我會同啲鯊魚一齊游水。好多人畀《大白鯊》灌輸咗一個對鯊魚負面嘅形象，我諗部紀錄片可以扭轉呢樣嘢。」

穿山甲以外，Sharon表示已參與拍攝有關鯊魚嘅紀錄片，將安排在IMAX影院放映，推廣環保意識。

飯敍時Sharon所佩戴嘅獅形「飾物」，實為佢嘅印章。

對於Andrew現任女友Sabrina，Sharon有讚冇彈。

 

Sharon近年既為海洋生態保育（上圖），又身體力行保護瀕臨絕種嘅穿山甲，推廣環保意識不遺餘力。

剛拍完網劇嘅Andrew，有機會在即將開拍的《古惑仔》電影中，飾演少年陳浩南。

媽媽經驗談

Andrew聞言即表示：「我o依家怕水都同《大白鯊》有關，我記得細個大概兩歲左右，媽咪喺帶我游水嘅前一晚，居然畀我睇《大白鯊》！自此之後我就好驚水，我諗係童年陰影。」

不過，Andrew喺陸上就矯捷過好多人，從佢啱啱拍嘅網劇《奪命島》就知。「個劇要去東龍島拍一啲動作鏡頭，有一場戲係要我爬山，因為當時太大風，劇組本來話第二日先拍，但係我諗住慳啲budget，冇替身都自己去爬，又冇做足安全措施。點知爬爬吓，有嚿石甩咗出嚟⋯⋯我就執生拍埋個shot，只係擦傷少少。」

Sharon一聽之下，立即同囝囝分享經驗。「你下次唔可以咁o架，為咗拍一個shot，你有機會拖慢成個crew。以前我就試過，拍一個落地向前滾、然後舉槍嘅shot，拍嘅時候OK冇事，但後來我先知因為自己落地有少少偏差，整斷咗條鎖骨，咁就要唞兩個月。所以你拍動作戲，一定要做好晒安全措施！」

焗蔬菜千層闊麵（$98），將平時嘅肉醬餡料換上蔬菜，入口更覺清新。

川椒爆蝦球（$120），彈牙蝦球帶醒神辣味，極具特色。

黃咖喱蔬菜紅米飯（$78），惹味咖喱配上健康紅米飯，夠晒balance。

竹笙雲耳泡時蔬（$88），清甜不膩。

香煎海鱸魚配蔬菜、檸檬奶油醬（$98），海鱸魚皮脆肉嫩，同檸檬奶油醬夾得好。

頤膳房
地址：荔枝角青山道800號饒宗頤文化館H座
電話：28119398