為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 03 月 27 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

殭化2.0

作為香港土生土長嘅影迷,我相信八十年代盛行嘅殭屍電影,喺你哋心目中佔有一定地位!上映中嘅《夠殭清道夫》,就包含晒舊作嘅精英,同埋新世代嘅演員及優化過嘅造型、情節,不論有冇觀賞過經典,都值得入場支持!

今次「Paco巨星飯堂」,我就邀請到「殭界」嘅中流砥柱錢小豪,率領佢戲中嘅徒弟BabyJohn(蔡瀚億),同飾演殭屍、嚟自馬來西亞嘅網紅女神林明楨,去到位於新蒲崗嘅「潮食街」,品嘗既有香港特色,又富亞洲色彩嘅fusion菜式,暢談呢部2.0嘅殭屍電影。

《夠殭》集合港、馬兩地代表,既有同片種元祖級人馬小豪哥(中),又有新血BabyJohn同馬來西亞網紅女神林明楨,仲唔係新舊「殭粉」大召集?

 

我帶三位嘉賓去到位於香港九龍貝爾特酒店嘅「潮食街」,品嘗既有香港特色,又富亞洲色彩嘅fusion菜式。

 

經典現代化

BabyJohn追殺殭屍,為挑戰連場動作,埋位前要特訓狂操,佢話要多得戲中師父小豪哥悉心教導。「雖然我喺《殺破狼2》都試過動作場口,但係今次要跟住小豪哥打殭屍王,所以埋位之前,我用咗一個月時間操練。開工嘅時候,小豪哥同武指會再教我幾招。」

電影打正旗號要向殭屍電影致敬,所以就搵嚟小豪哥、袁祥仁、吳耀漢等元祖級人馬上陣,BabyJohn同一眾前輩合作,坦言好有挑戰性:「我同兩位導演都係殭屍迷,所以會想喺呢個題材上加啲新元素,希望喺官能上有啲新刺激。喺故事上就講香港一直有殭屍存在,以前就係林正英嗰邊負責,現在就批畀食環署搞,食環署負責清理垃圾,殭屍對香港人來說都係一種需要清理嘅垃圾,要由特別部門清理。

「但係我哋部門得嗰幾個人,趙學而飾演部門主管,小豪哥同Uncle Richard(吳耀漢)係前線人員,負責衝出去打殭屍,再由道士袁祥仁去超度;有羅莾師傅,唔好睇佢咁大隻,戲中佢係鍾意種盆栽,出動時負責開車同後勤工作,而我就係一個新丁,誤打誤撞下加入咗呢個部門。」

BabyJohn同首次拍電影嘅明楨合演「人殭」情侶,外形合襯度已經可以加分。

 

五十四歲嘅小豪哥,喺戲中應付動作場面冇難度,依然Keep住好身形好身手,佢話箇中並無「秘訣」:「最重要係個人保持心境開朗!」

 

被網友「供奉」為女神,明楨就自爆曾為地獄廚神,其中一位受害人就係圖中嘅男士——明楨親細佬。

 

盛讚「徒弟仔」

BabyJohn仲話,戲中最難忘同小豪哥惡鬥殭屍王一幕,喺鏡頭前凌空踏牆再翻身出擊,動作流暢,而小豪哥對呢位徒弟仔,亦有讚冇彈。「Baby好勤力,而且悟性又高,佢知道自己嘅不足之處,所以成日喺片場度練。o依家拍呢啲動作場面,我都覺得辛苦o架!同三十幾年前好唔同,以前我就做人徒弟,o依家就做Baby師父,將殭屍片傳承落去啦!」

一旁嘅BabyJohn繼續向師父致謝:「都係嗰句,我好多謝小豪哥教我連串動作武打,令我可以喺戲中打得順暢。其實今次仲有另一個挑戰,除咗應付動作場面,明禎喺戲入面一句對白都冇,所以我哋啲對手戲,都係透過眼神去感受。」

飾演殭屍嘅明禎就話:「我看到沒有對白時是有點開心,因為我的廣東話很差,但沒有對白也有一定難度,因為只能靠眼神和表情,去傳繹當下的感覺和情緒。每次我跟BabyJohn對戲時,都會想不能講話該怎麼演,幸好他演得很自然,很快把我拉入戲。」

將捉殭屍列入食環署嘅部門,電影嘅故事前設夠晒天馬行空,加上新舊配合嘅成員,大可滿足「殭粉」口味。左起:羅莽、袁祥仁、BabyJohn、趙學而、吳耀漢及小豪哥。

 

睇八十年代殭屍片大嘅影迷,對BabyJohn(右)呢個貼符動作一定唔會陌生,小豪哥就榮升師父,甚有大師風範。

 

今次嘅殭屍由明楨飾演,外形同以往着清裝、面容蒼白嘅「殭屍」南轅北轍,有啲驚喜。

 

女神地獄時

今次嘅殭屍造型都有所改良,唔再係僵硬死直嘅清裝白臉尖牙殭屍,廿六歲嘅明禎示範點做靚殭屍。「這是我人生第一部戲,剛接到劇本得知要跟這班前輩合作覺得很不可思議,緊張又期待,幸好大家都很有耐心指導我。

「造型分幾個Level,一開始也很恐怖的,後來我吸了BabyJohn的血,那些爛皮膚就慢慢脫掉,慢慢變成一個人的樣子。這個特技化妝,每次需要七個小時來上妝,卸妝也要六個小時,加起來就需要一天時間,而我的皮膚也因此過敏變成包青天,過敏就需要兩天待皮膚好了,又要再化過。」

明楨被網友稱為女神,但佢話自己下廚嘅時候,一度做過地獄廚神。「小時候我要幫忙照顧兩個弟弟,要吃東西的時候,我試過煮了一些生米粥給他們吃⋯⋯我很喜歡吃粥,但當時我以為放米放水到鍋子裏,水開了就可以吃,不知道要把米煮爛了才可以吃,所以他們吃了不少那些生米粥呢!」

自家製手剁鯪魚肉煎釀三寶($58),配上秘製芝士醬嘅煎釀三寶,糅合香港同歐洲特色。

 

豆豉鯪魚薄餅($62),以意大利嘅Anchovy(鯷魚)作靈感,換上100%港式嘅豆豉鯪魚,更見風格。

 

原盅燉佛跳牆($68),用料包括鮑魚、海參、螺頭、瑤柱等,落足料燉六小時,不加味精就夠晒健康。

 

香煎雞扒配喇沙汁伴椰香飯($103),煎得外脆內軟滑嘅雞扒,配上餐廳秘製嘅喇沙汁,令人回味無窮。

 

炭燒叉燒餐肉煎蛋食神飯($113),選用巴西上等梅頭肉炮製,啖啖炭香味令味覺享受提升。

 

薑葱牛筋腩辦麵($103),牛筋腩燜得入味,亮點係又爽口又有薑葱香味嘅粗麵,值得推介。

 

鮮濃魚湯浸菜苗($78),以煮製三小時嘅鰂魚湯作湯底,相當清甜。

 

自家製豆腐花($43),香軟滑溜。

 

潮食街

地址:新蒲崗六合街19號香港九龍貝爾特酒店1樓

電話:31121998