為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 03 月 16 日

林鄭熟書 鬍鬚口窒 胡官形象取勝

首選舉進入倒數階段,各界都放眼本周二舉行嘅特首候選人電視台聯合論壇,爭住睇三個候選人唇槍舌劍嘅場面,而過去一星期,資訊科技界選委、記協及教協,分別搞咗幾場座談會,絕對可以視為電視聯合論壇舉行前嘅熱身賽。

除咗評論辯才,形象包裝都好重要,時裝設計師鄧達智認為,候選人林鄭月娥、曾俊華(鬍鬚曾)及胡國興(胡官)都走保守路線,揀最穩打穩陣嘅服飾,當中以胡官平凡中帶出專業形象,畀人值得信任嘅感覺,「佢着三件頭套裝加埋領呔,好英式,雖然無驚喜,但形象穩重。」

至於林鄭呢幾日嘅戰衣都係套裝加頸巾,出席教協論壇時仲戴條淺藍色頸巾,鄧達智說:「呢條頸巾幫佢加咗唔少分,成個人好醒目,令人眼前一亮。」但佢認為,套裝突出唔到女性嘅形象,如果改着旗袍可能會更出眾。

鬍鬚曾就鍾意着西裝外套、衫唔扣頂鈕、唔打呔迎戰,鄧達智點評說:「打扮簡約,塑造年輕形象。但佢講嘢咬字唔清,係最大扣分位。」
但對於選委嚟講最重要都係候選人嘅施政理念及政策熟悉度,唔少選委覺得林鄭最熟書,即使係提名咗胡官嘅高教界選委呂秉權都承認,林太嘅表現優勝,「佢對政策好熟悉」;非牟利幼兒教育機構議會主席甘秀雲亦認同,林鄭表現較佳。

至於鬍鬚曾,唔少選委覺得佢明顯有溫書,但幾乎係臨急抱佛腳那種。而且有時會失準,好似記協搞嘅座談會,台下人士多數係記者,提出咗唔少尖銳問題,當有人問鬍鬚曾鍾意寫網誌、做「鍵盤戰士」單向地發放資訊,好似當記者無到,佢即時燶口燶面否認,強調重視同傳媒溝通,仲叫主持區家麟「留心啲」睇佢政綱先好問問題,火藥味濃。

亦有選委覺得鬍鬚曾,有時口窒窒,「尤其被問到一些政府政策時,表現得唔係好熟悉,更遑論領袖風範。」

胡官方面,唔少選委覺得佢表現淡定,不時借位放吓冷箭暗寸對手,演講技巧老練。不過,選委話特首選舉唔係辯論比賽,佢哋最着重候選人嘅政治立場,但o依家仲未決定投票畀邊個。

三位特首候選人喺台上較勁政綱、管治能力,連外形打扮都畀外界評頭品足,睇吓邊個有政治魅力。

 

特首候選人論壇吸引到大批傳媒採訪,為電視辯論作最後熱身。

 

候選人所到之處都有示威者喺場外抗議及批評佢哋嘅政綱。