為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 03 月 15 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

細味「三八」

搵過啲資料話說三八婦女節源於1903年3月8日,美國芝加哥市嘅女工為咗反對資產階級壓迫、剝削、歧視、爭取自由平等舉行大罷工同示威遊行,當年仲得到廣大勞動婦女嘅支持兼熱烈響應。到咗1910年,國際社會主義者婦女代表大會規定每年嘅3月8日為國際婦女節。到咗1975年,聯合國表揚全世界勞動婦女為爭取和平、爭取婦女兒童權利、爭取婦女解放等作出貢獻正式定三八節。

有好多女性朋友已不下一次向我投訴,喺職場上有啲老闆暗地裏都有啲啲性別歧視,除非嗰個係女老闆。單純以男性老闆角度去睇,從古到今都係男女大不同,先撇開同工同酬呢個層面,男女其實喺唔同工種嘅需求上,的確又係會有啲分別,就好似前台接待員通常會以女士居多,不過近年都開始見到有男士做呢個崗位,建築業或重型建造業就通常會以男士居多,有啲工種更擺到明係較適合一係男士一係女士去做,我唔覺得咁係因為性別歧視,反而單純認為係以工種做配對多啲。喺做事層面嚟睇,我唔傾向支持火星男抑或金星女,喺職場上只認同有能者居之。

有資料顯示喺《2016年議會中的女性:年度回顧》報告提到,世界各國議會中女士嘅平均比例從2015年嘅22.6%上升去到2016年嘅23.3%,比起十年前嘅16.8%增加咗6.5個百分點。截至去年12月,全球68個地區議會當中,女士佔至少30%席位嘅,喺44個議會中佔唔夠10%,目前仲仍有五個議會內根本無女士,報告指出近年婦女參政趨於穩定,但仍呼籲國際社會需更努力放下性別歧視。

純以科學啲啲嘅角度去睇,人類喺發育成長過程中,大腦結構因為男女差異、社會生態等等嘅行為影響下,令發育同成長中會產生好多唔同嘅變化,男女無論喺生理、身體、同心理嘅結構層面,基本上都唔一樣,我基本覺得女士做起嘢上嚟一般較細心,男士做起嘢上嚟大多一般較沉默內斂,我請人會着重對方嘅情緒智慧/智商(EQ)多啲,升職加薪會睇同事嘅辦事能力,喺性別呢個環節反而唔太重視。

世界應該係男女平等嘅,咁唔知香港今年選特首,有無機會體現政治性別平等呢?到咗今日,冒着被老婆、個女同啲女性朋友鬧,都要講下我嘅諗法,婦女節一如光棍節,呢個非勞工假嘅節日,對我嚟講咪又係另一個消費嘅市場銷售策略,主要功能係為咗哄哄老婆同個女等等嘅女性,近年坊間對三八婦女節,都起咗較潮但又不失可愛嘅名,好似老婆節、女神節、女王節等等,照字面都好容易解讀到當中嘅含義,你明嘅。

現今的婦女節,可能如光棍節般,只是另一個消費的市場銷售策略。