梁釗峰潛心學佛

男子組合C AllStar成員梁釗峰熱愛音樂，曾經係城大歌唱比賽同大專聯校歌唱比賽多屆嘅冠軍人馬。原先，佢諗住畢業之後就投身廣告或做公關，但因為對音樂仍然有一團火，所以佢最終決定發展音樂事業。

日前，東姑去咗一個放生活動，同船就撞到釗峰嘞。佢同東姑講雖然唔算係一個虔誠嘅佛教徒，但係學咗佛都有四年，覺得個心平靜又舒服咗，所以不停去鑽研。而喺呢四年內，就參與過幾十次放生活動，亦曾經創作過一啲同佛有關嘅歌曲，好似有〈你沒有離開我〉。「雖然我唔係食全齋，但係我已經戒咗食牛肉同埋蟹，亦唔會食生猛游水嘅海鮮。」最近，佢就忙住籌備新碟《Lovaholic vol.2》，同埋十月喺紅館嘅演唱會，東姑問佢開幾多場？佢笑住咁話：「能夠開幾多場，就係睇大家嘅反應啦！」粉絲千祈咪「放生」呢個機會嘞。

四年前，釗峰開始對佛學有興趣，並慢慢用心去領悟，亦經常參與放生活動。

雖然釗峰未能夠食全齋，但係已經戒咗食牛肉同埋蟹，亦唔會食生猛游水嘅海鮮。