為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 03 月 17 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

圓夢琪緣

香港歌手大多有同一個夢想——喺紅館開個唱,而Fiona(薛凱琪)已經兩度實現呢個「歌手夢想」,所以佢嘅Dream Concert,係舉行較為小型、以台下粉絲為中心嘅演唱會。四月佢就喺旺角麥花臣圓夢,一連三晚舉行《夢之途中 薛凱琪音樂紀2017》演唱會,展現最自然嘅一面。

我就同Fiona去到位於灣仔嘅「Catalunya」,品嘗特色嘅加泰隆尼亞菜式,暢談佢嘅音樂經!

今次Fiona藉住演唱會突出番佢嘅音樂人形象,仲會為粉絲帶嚟驚喜,真係要拭目以待。

親密接觸

得悉Fiona有舉行小型演唱會嘅心願,我梗係會為佢圓夢!佢解說話:「喺紅館開show係要fancy啲嘅,但係我喺麥花臣開show,就可以同粉絲做朋友,仲可以任性啲唱side cut歌,唱自己好喜愛嘅歌,咁冇理由喺紅館唱side cut歌吖嘛。我又可以玩一啲紅館玩唔到嘅嘢,例如重編我耳熟能詳嘅歌,好多plug過嘅歌,我都未唱過live,因為我plug完去咗拍戲。好似Paco你幫我揀嘅〈點水蜻蜓〉咁,連我自己都未聽過自己唱live,今次終於可以唱嘞!」

Fiona今次為粉絲,可謂費盡心思。「我決定用舞台劇形式去做呢個show,希望粉絲唔係入場睇我表演,而係好似唔覺意咁嚟咗我屋企客廳,睇到我自己同自己唱歌,生活化啲、夢幻啲。喺音樂上,我仲搵咗未合作過嘅『觸執毛』為大會樂隊,樂隊成員Mike Orange就做音樂監製。」

為咗視覺效果,Fiona喺舞蹈上都特別下一番苦功。「好多嘢都會重新編排過,包括舞蹈,我特登去學modern dance,由零開始,日日學完就練舞。」

Fiona仲提到個唱特設VIP門票,每場最多畀100名歌迷會粉絲入座,每位附送驚喜禮物外,完騷後仲享有合照同額外聽佢唱歌嘅機會。

我同Fiona去到位於灣仔嘅「Catalunya」,品嘗特色嘅加泰隆尼亞菜式。

 

為咗演唱會,Fiona除咗勤力背歌詞,仲日日努力練舞,務求到時以最佳狀態示人。

 

 

 

分子橄欖($18/粒),味道清新。

 

炒蛋伴薯仔泡沫及魚子醬($145),係香滑加鮮味嘅代表。

 

伊比利亞火腿($360)配上番茄多士($80),火腿嘅鹹香同多士好夾!

 

積極籌備

講到驚喜禮物,Fiona就話:「今次個show係由我自己負責編排rundown,未知可唔可以加插嘉賓,但係一定忙過去紅館開騷。畀粉絲嘅surprise,係我自己design自己畫嘅一啲紀念品,詳情要保持神秘先!

「我最近又推出個人品牌時裝,要兼顧設計工作,不過好開心可以實現到其中一個兒時夢想。我今日着呢件衫,都係呢個品牌嘅。個名『SPIRITUNUS』都係我諗,SPIRIT係『靈』,UNUS係拉丁文嘅『唯一』同『大同』,我希望所有嘢大同、equal,無分你我。」

開show在即,Fiona除咗做自己品牌嘅生招牌,最重要都係keep住最佳狀態。「飲食上已經開始配合,我已經戒咗零食,因為好多零食都有好多糖份,所以一定要戒!不過有一樣嘢我真係戒唔到,就係辣!我連食炒飯都要加辣,o依家食少啲,但係真係戒唔到。哈哈!」

讀設計出身嘅Fiona,今年仲投身時裝設計行列,品牌名為「SPIRITUNUS」,除咗自己做生招牌,佢仲特別送贈首季作品畀圈中好友如Sammi、阿Sa、阿嬌等。

 

演唱會名為《夢之途中 薛凱琪音樂紀2017》,係Fiona送畀粉絲嘅禮物,你哋準備好拆禮物未呀?

 

松露比堅尼($135),此「比堅尼」並非指泳裝,而係薄三文治,餡料係芝士加伊比利亞火腿及黑松露,三者味道各有特色但出奇地配合,讚!

 

牛油果龍蝦卷($250),以清香嘅牛油果包住龍蝦肉、洋葱等餡料,提升味覺層次。

 

煙燻八爪魚($210)加上特濃芝士醬(後),非常惹味。

 

三年心血

為咗以最佳狀態、姿態示人,Fiona為演唱會落足心機,「除咗一啲我好鍾意嘅歌,我仲會喺個show度唱新歌,因為我喺夏天會出新嘅國語碟,我搵咗方大同幫我造呢隻碟,我想率先喺個show入面唱其中一首快歌,叫〈520〉,即係我愛你嘅意思。

「呢隻碟已經錄咗三年,o依家只係爭一首歌就錄晒,原因係我同大同呢三年都好忙,兩個一齊可以錄音嘅時間唔多;有時我同佢聽番兩年前錄好嘅歌,我哋都覺得可以做得再好啲嘅話,就由頭開始再arrange過、錄過嗰首歌,所以搞咗好耐。」

不論係演唱會定係新碟,我相信Fiona喺音樂上可以繼續發光發熱!預祝佢good show!

Fiona嘅新國語大碟,由一四年錄到一七年,係佢同老友兼音樂才子方大同嘅心血結晶。

 

 

 

塞哥維亞風味烤乳豬($895)皮脆肉嫩,配上茴香玉桂烤菠蘿($70),更具風味。

 

西班牙肉桂油條($95)作甜品,不論點上鮮忌廉或朱古力醬都滋味。

 

Catalunya
地址:灣仔愛群道32號愛群商業大廈地下
電話:28667900