為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2017 年 03 月 12 日

傻人有傻福 麥美恩

當今世代,藝人獲網民like才是王道。

麥美恩因為在《學是學非》中成為其他「是非精」的整蠱對象,加上她予人印象嘈喧巴閉、搞笑又願意騎呢,網民一句「識揀一定係揀麥美恩!」封她為「甜心小姐」和「女神」。「女神……哈哈哈哈!o依家呢個稱號嘅定義,真係好闊呀吓!哈哈哈!不過啲人竟然接受到我呢啲咁嘅character,我係真心感恩嘅!」

她一一年參選港姐得「梗頸四」出道。「第四名,都算係有少少成績咁啦,哈哈哈!始終講樣靚……我唔係走呢啲路線囉!哈哈哈!同埋好處係唔使孭住港姐嘅包袱咁耐,好快可以轉型囉!哈哈!」當過娛樂新聞主播,做埋「是非精」外,去年既拍住曾志偉主持《我愛香港》,又被安排到廣西落二百米天坑拍《天與地》,更被提名《2016年萬千星輝頒獎典禮》的「飛躍進步女藝員」,近期甚至成為了廣告商的搶手代言人。「上年真係豐收嘅一年,年尾我有份參與嘅節目仲有獎攞,簡直係bonus!」

人氣爆晒燈,難得她仍保持着那副傻大姐的開朗性情,像這天她拍照時,看到為她準備的幾件蛋糕,即時雙眼發亮,件件都話想食;訪問時說得興奮了,又會懶顧儀態仰天大笑,笑聲響徹整間餐廳。

「好多人都話我笑得好大聲,其實因為我喺個好熱鬧嘅家庭成長,見過我屋企人就明,因為我屋企個個一笑就係開懷大笑嗰啲,好嘈!」

說罷,她又再哈哈哈哈笑起來——終於明白她何解會得網民歡心。

 

 

搶皇位

麥美恩在加拿大溫哥華土生土長,是家中的孻女。「我爹哋、媽咪係好早期移民過去加拿大嘅華僑,我對上仲有兩個哥哥,一個大我十一年,一個大我九年。」

話晒孻女拉心肝,又有兩個不會跟自己爭嘢玩的哥哥,照計她從小應該是過着溫室公主的生活。「梗係唔係啦!」她不屑地說。「我細細個同我兩個阿哥啲感情唔好o架,年紀相差太大,根本溝通唔到!尤其是我二哥,佢細個好唔鍾意我搶咗佢喺屋企嘅『皇位』,佢享受咗九年(孻仔拉心肝生活),突然間彈多個出嚟喎!哈哈哈!」

猶幸隨着三兄妹年紀漸大,彼此的感情愈見融洽。「我係到讀大學,要揀入乜嘢科嘅時候,搵阿哥佢哋傾,我哋先突然click到、溝通到。到o依家,我哋啲關係愈嚟愈好,我feel到其實佢哋一路以嚟都好錫我,但佢哋係男仔,所以先唔會表達出嚟,冇理由無啦啦會同我講:『I love you!』咁核突o架嘛!哈哈哈!o依家佢哋有時見到我好努力咁去做嘢,就會message問候吓我,又或者send啲姪仔嘅相嚟鼓勵我,呢啲咁細微嘅舉動,我已經覺得好sweet!」

 

 

麥美恩說,一一年參選港姐,純粹出於好奇心,沒想過做明星。而麥媽媽即使擔心,依然身體力行,由加拿大來港支持愛女,令她深受感動。

 

一一年,麥美恩參選港姐,被傳媒封她為「龍躉村姑」。「我嗰陣以為呢個朵,係解next door girl,覺得幾親切,後尾先知係笑我身材同打扮,哈哈哈!」