「星爺腔」嚴寒送暖

東姑聽收音機久唔久都會聽到有把周星馳（星爺）聲音賣廣告。試問今時今日，點可能搵到星爺喺電台聲演廣告呢？其實，呢把零瑕疵演繹出周星馳神韻嘅「星爺腔」，係來自廣州嘅溫超。

溫超早喺十八歲就開始用「星爺腔」去報道交通消息，又拍網上喜劇短片，所以喺廣州都有啲知名度。不過，唔講唔知，原來佢好細個就已經篤信佛教，並擁有一顆善心，鍾意周圍去幫人。早排天氣嚴寒，佢就喺網上發起籌款，買棉被、大衣，派畀廣州街頭嘅露宿者。佢仲同東姑講，自從出嚟做嘢之後，就會將薪金嘅三分之一，攞嚟做善事，雖然佢喺廣州只係住公共屋村，但係都咁有愛心慷慨解囊，真係難得！

見到路上執紙皮嘅婆婆，溫超即刻忍唔住要喺錢包，搵張十蚊畀阿婆買飯盒。

 

溫超唔止發起籌款，佢仲親力親為去買棉被，跟住親自送到露宿者嘅手中。