為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2017 年 02 月 23 日

張振朗繼續呵護蔡思貝

早前,蔡思貝被指慘遭排舞師男友麥秋成狠飛;跟住,佢就被拍到狂放電,姣擒新劇拍檔張振朗療情傷。不過,近日又有指蔡思貝同麥秋成復合,兩個仲秘密搬到西貢南圍嘅村屋同居,之但係麥秋成轉頭又畀雜誌影到,陪索女到銅鑼灣烤肉兩粒鐘,感情七國咁亂,東姑真係畀佢哋搞到暈陀陀。

日前,蔡思貝、張振朗、王浩信、李佳芯同林韋辰,一齊到西營盤為《踩過界》拍外景。當晚,蔡思貝拍攝前先做咗一陣嘅拉筋動作,原來佢要踩住三吋斗零踭,拎起支棒球棍,喺條斜路來回喪跑拍攝,隨後又要瞓喺地下,其餘演員就圍埋去,大叫:「頂住先!」作安慰。呢場戲前後都拍咗成三粒鐘,可能佢因為太耐冇做運動,竟然跑到腳震震。

東姑見蔡思貝跑完一輪之後,張振朗就挺身而出,行埋去幫佢整咪,關懷備至!如果與麥秋成復合唔成,又會唔會考慮下張振朗呢?拍攝後,蔡思貝就同東姑講,佢同張振朗冇機會發展,又話佢哋喺戲入面嘅關係,就好似洪永城同黃翠如,所以好易被誤會友情係姣情喎。佢更話:「假如我同張振朗嘅話,我會變成男人,完全冇可能!其實,電力同友善只係一線之差。」聽到東姑一嚿雲,不過最緊要都係麥秋成明白啫。

轉位拍時,張振朗暖男上身,同工作人員,夾手夾腳幫蔡思貝整咪,完全唔怕再傳緋聞!

 

踩住三吋斗零踭嘅蔡思貝,拎住一支棒球棍,帶着五丁友起勢喺斜路向上跑,煞氣極重。

 

尾聲,劇中男主角王浩信又走埋去,抱起蔡思貝安慰佢,場面感人。

 

自小就學芭蕾舞嘅蔡思貝,當路邊係排舞室,就地壓腿拉筋,柔韌度十足。