捉到正！鄭丹瑞拖女行街、攞車

鄭丹瑞（阿旦）拍住「女神」周秀娜合演的《小男人週記3之吾家有喜》是農曆年唯一上映的港產賀歲片，早前阿旦忙完電影宣傳，趁得閒同大女鄭瑤到銅鑼灣利園Shopping，行完街去停車場攞車期間，鄭瑤突然拖實爸爸一齊行，兩父女步伐一致，畫面好有愛。

 阿旦和女兒終於有返啲私人時間，早前見他和大女鄭瑤於黃昏時份到利園商場行街，不過行咗一陣見冇乜心水便決定走人。他們途經希慎道、禮頓道，再行到黃泥涌道，並向香港足球會方向進發。只見他們行得好匆忙，明顯趕時間，鄭瑤仲繞實爸爸行咗一段路，之後索性拖實爸爸，合體後的兩人愈行愈快，從後Follow嘅記者表示行到索晒氣。之前網上瘋傳阿旦教女法，觀乎鄭瑤願意拖實爸爸行街，阿旦教女真係幾有計。

大年初二，阿旦帶埋兩個寶貝女和鄧月平、談善言一齊到大埔林村許願樹為電影做宣傳。問會否父女檔再拍戲？阿旦說：「佢哋過吓癮就得，擔正我會好緊張、好驚！」兩位女兒亦表示今次有得過鏡已很滿足。

 

鄭丹瑞同大女鄭瑤十指緊扣行嚟行去，場面溫馨。

旦哥表示自己甚有女人緣，同女兒相處融洽，經常談天傾心事。